काठमाडौं । नेपाल प्रिमियर लिग (एनपीएल) क्रिकेटअन्तर्गत आज जनकपुर बोल्ट्स र पोखरा एभेन्जर्सबीच प्रतिस्पर्धा हुँदैछ। कीर्तिपुरस्थित त्रिभुवन अन्तर्राष्ट्रिय क्रिकेट मैदानमा हुने खेल साँझ ५ बजे सुरु हुनेछ।
आजको खेलमा जनकपुर बोल्ट्स दोस्रो जित निकाल्ने लक्ष्यसहित मैदान उत्रँदा पोखरा एभेन्जर्स भने प्रतियोगितामा पहिलो जितको खोजीमा हुनेछ। जनकपुरको कप्तानी हर्मित सिंहले गरिरहेका छन् भने पोखराको नेतृत्व कुशल भुर्तेलले सम्हालिरहेका छन्।
जारी प्रतियोगितामा जनकपुरले मिश्रित प्रदर्शन गरेको छ। दुई खेल खेलेको जनकपुरले एकमा जित र एकमा हार बेहोरेको छ। पहिलो खेलमा कर्णाली याक्ससँग पराजित भएको जनकपुरले दोस्रो खेलमा काठमाडौं गोर्खाजलाई हराउँदै जितको लयमा फर्किएको थियो।
यता पोखरा एभेन्जर्सले भने प्रतियोगिताको आफ्नो पहिलो खेलमा सुदूरपश्चिम रोयल्ससँग हार बेहोरेको थियो। त्यसैले आज जनकपुरलाई हराउँदै अंक तालिकामा पहिलो जित दर्ता गर्ने दबाब पोखरामाथि छ।
दुई टोलीबीचको विगतको नतिजा हेर्दा प्रतिस्पर्धा बराबरी देखिन्छ। एनपीएलका अघिल्ला दुई संस्करणमा दुवै टोलीले एक–एक खेल जितेका छन्। सन् २०२५ को संस्करणमा पोखराले जनकपुरलाई २५ रनले पराजित गरेको थियो। त्यसअघि सन् २०२४ मा जनकपुरले पोखरालाई सात विकेटले हराएको थियो।
यसपटक पनि दुवै टोलीबीच प्रतिस्पर्धात्मक खेल हुने अपेक्षा गरिएको छ। जनकपुर जितको लय कायम राख्ने योजनामा रहँदा पोखरा पहिलो जित निकाल्दै प्रतियोगितामा पुनरागमन गर्ने दाउमा हुनेछ।
