काठमाडौँ । रसुवाको भोटेकोशी नदीमा आएको बाढीमा परेर सम्पर्कविहीन भएका विभिन्न देशका २६१ विदेशी पर्यटकको उद्धार गरिएको छ।
नेपाल पर्यटन बोर्डका अनुसार बुधबार बिहान आएको बाढीपछि सम्पर्कविहीन भएका पर्यटकमध्ये शनिबार साँझसम्म १६ देशका २६१ जनाको उद्धार गरिएको हो।
बोर्डका निमित्त प्रमुख कार्यकारी अधिकृत हिक्मतसिंह ऐरका अनुसार गोसाइँकुण्ड र कैलाश मानसरोवर यात्रामा विभिन्न कम्पनीमार्फत गएका पर्यटकको उद्धार गरिएको हो।
उद्धार गरिएकामध्ये भारतका १६७, चीनका ४०, जर्मनीका चार, माल्टाका चार, इटालीका तीन, अमेरिका र युक्रेनका तीन तथा आठ जना रहेका छन्। यस्तै, बेल्जियम, बुल्गेरिया, ओमान र पोर्चुगलका एक–एक तथा रुस, स्पेन, स्वीजरल्यान्ड र टर्कीका दुई–दुई पर्यटकको पनि उद्धार गरिएको बोर्डले जनाएको छ।
यसैगरी, देश तथा परिचय खुल्न नसकेका थप २१ पर्यटकको पनि उद्धार गरिएको छ। बाढीपछि अझै ३२० पर्यटक सम्पर्कविहीन रहेको पर्यटन बोर्डले जनाएको छ।
प्रभावित क्षेत्रमा रहेका पर्यटकको खोजी तथा उद्धारका लागि संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड, पर्यटक प्रहरीलगायत निकाय परिचालन भएका छन्। घाइते तथा अलपत्र पर्यटकलाई सुरक्षित स्थानमा ल्याउने कार्यलाई तीव्रता दिइएको बोर्डले जनाएको छ।
बोर्डले पर्यटकको सुरक्षा पहिलो प्राथमिकता रहेको जनाउँदै प्रभावित क्षेत्रका नागरिक तथा पर्यटकलाई धैर्य र सतर्क रहन आग्रह गरेको छ। थप जानकारी वा सहयोगका लागि टोल फ्री नम्बर १२३४, हटलाइन ११४४ तथा पर्यटन प्रहरी ९८५१२८९४४५ मा सम्पर्क गर्न सकिने जनाएको छ।
