चितवन– वीरगञ्जस्थित नारायणी अस्पतालका चिकित्सकमाथि भएको आक्रमणको विरोधमा चितवनका स्वास्थ्यकर्मीले सोमबार बहिरङ्ग (ओपीडी) सेवा बन्द गरेका छन्। आन्दोलनका कारण भरतपुरसहित जिल्लाका प्रमुख अस्पतालमा दैनिक उपचारका लागि आउने ११ हजारभन्दा बढी बिरामी प्रभावित भएका छन्।
शनिबार वीरगञ्ज महानगरपालिका–२५ का राजकुमार पटेलको उपचारका क्रममा मृत्यु भएपछि परिवार तथा आफन्तले चिकित्सकको लापरबाहीका कारण मृत्यु भएको आरोप लगाएका थिए। त्यसपछि नारायणी अस्पतालमा कार्यरत मेडिकल अफिसर डा. प्रमोद राममाथि आक्रमण हुँदा उनी गम्भीर घाइते भएका थिए।
उक्त घटनाको विरोधस्वरूप भरतपुर अस्पताल, बिपी कोइराला मेमोरियल क्यान्सर अस्पताल, चितवनका दुई मेडिकल कलेज तथा २३ वटा निजी साना अस्पतालले आकस्मिक सेवाबाहेकका सबै उपचार सेवा स्थगित गरेका हुन्।
भरतपुर अस्पतालमा मात्रै सोमबार करिब तीन हजार ५०० बिरामीले ओपीडी सेवा लिएका थिए। त्यस्तै, बिपी कोइराला मेमोरियल क्यान्सर अस्पतालमा दैनिक करिब एक हजार २००, दुई मेडिकल कलेजमा दुई हजारभन्दा बढी तथा निजी साना अस्पतालमा चार हजारभन्दा बढी बिरामी बहिरङ्ग सेवाका लागि आउने गर्छन्।
उपचारका लागि भरतपुर अस्पताल पुगेकी मायादेवी लम्सालले मधुमेह र उच्च रक्तचापको औषधि सकिएपछि अस्पताल आएको भए पनि सेवा बन्द भएकाले उपचार नपाएको गुनासो गरिन्। अर्की सेवाग्राही रन्जीत तामाङले पनि ओपीडी बन्द हुँदा उपचारबाट वञ्चित हुनुपरेको भन्दै दुःख व्यक्त गरिन्।
नेपाल चिकित्सक सङ्घ, चितवनका वरिष्ठ उपाध्यक्ष डा. दीपेन्द्र न्यौपानेले चिकित्सकमाथि भएको आक्रमण निन्दनीय भएको भन्दै दोषीमाथि कानुनी कारबाही नभएसम्म आकस्मिक सेवाबाहेकका अन्य सेवा सञ्चालन गर्न कठिन हुने बताए।
चितवनस्थित बिपी कोइराला मेमोरियल क्यान्सर अस्पतालमा नेपालका विभिन्न जिल्लासँगै भारतीय सीमा क्षेत्रबाट समेत बिरामी उपचारका लागि आउने गरेका छन्।
