बुटवल । नेकपा (एमाले) र नेपाल कम्युनिष्ट पार्टी (नेकपा) बीच सातै प्रदेशमा सत्ता सहकार्य गर्ने सहमति भएपछि लुम्बिनी प्रदेश सरकारमा सहभागी नेपाली कांग्रेसका मन्त्रीहरूले सामूहिक राजीनामा दिने तयारी गरेका छन्।
नेपाली कांग्रेसको केन्द्रीय समितिले असार अन्तिममै एमालेसँगको सत्ता सहकार्य अन्त्य गर्ने निर्णय गरे पनि लुम्बिनी प्रदेशमा कांग्रेसका मन्त्रीहरूले अहिलेसम्म पदबाट राजीनामा दिएका थिएनन्। तर शनिबार एमाले र नेकपाबीच प्रदेश सरकारमा सहकार्य गर्ने लिखित सहमति भएपछि कांग्रेसका मन्त्रीहरू नैतिक रूपमा सरकारमा बसिरहन नसक्ने निष्कर्षमा पुगेका हुन्।
हाल लुम्बिनी प्रदेशमा मुख्यमन्त्री चेतनारायण आचार्य नेतृत्वको सरकारमा कांग्रेस पनि सहभागी छ। कांग्रेसबाट शहरी विकास तथा खानेपानी मन्त्री सरोज थापा, आर्थिक मामिला मन्त्री धनेन्द्र कार्की, उद्योग, पर्यटन तथा यातायात मन्त्री प्रचण्डविक्रम न्यौपाने, सामाजिक विकास मन्त्री जन्मजय तिमिल्सेना तथा वन तथा वातावरण मन्त्री देवकरण कलवार मन्त्री रहेका छन्।
उद्योग, पर्यटन तथा यातायात मन्त्री प्रचण्डविक्रम न्यौपानेले एमालेले नेकपासँग औपचारिक रूपमा सत्ता सहकार्यको सहमति गरेपछि कांग्रेस सरकारबाट बाहिरिने निर्णयमा पुगेको बताए।
‘सबै मन्त्रीहरू छलफल गरेर सकेसम्म आजै राजीनामा बुझाउने तयारीमा छौं,’ उनले भने। ‘हामी सरकारबाट बाहिरिएपछि पनि उहाँहरूले बहुमत जुटाउन नसके मात्रै कांग्रेसले नयाँ सरकार गठनका लागि आवश्यक कदम चाल्नेछ।’
यस्तै, सामाजिक विकास मन्त्री जन्मजय तिमिल्सेनाले पार्टी र संसदीय दलको निर्देशनअनुसार नै आफूहरूले निर्णय लिने बताए।
‘म उपचारका लागि काठमाडौंमा छु। अहिलेसम्म संसदीय दलका नेताबाट कुनै निर्देशन आएको छैन,’ उनले भने, ‘दलले जे निर्णय गर्छ, त्यहीअनुसार अघि बढ्छु।’
