काठमाडौं । नेपाली काँग्रेसका नेता डा. शशांक कोइरालाले पार्टीभित्र देखिएको असमझदारी, अविश्वास र समूहगत प्रतिस्पर्धा समयमै समाधान गर्न नसके काँग्रेस विभाजनको अवस्थामा पुग्न सक्ने चेतावनी दिएका छन् ।
वीपी स्मृति दिवसका अवसरमा बुधबार काठमाडौंमा संस्थापन इतर समूहले आयोजना गरेको भेलालाई सम्बोधन गर्दै कोइरालाले पार्टीभित्रका असन्तुष्टि, मतभेद र विवादलाई संवाद र सहकार्यमार्फत समाधान गर्दै संगठनात्मक एकता सुदृढ बनाउनुपर्नेमा जोड दिए । अन्यथा पार्टीको एकतामा क्षति पुग्ने र त्यसको राजनीतिक तथा नैतिक जिम्मेवारी वर्तमान नेतृत्वले लिनुपर्ने उनको भनाइ थियो ।
कोइरालाले लोकतन्त्रका मूल्य–मान्यता, लोकतान्त्रिक संस्थाको संरक्षण र राष्ट्रिय हितलाई केन्द्रमा राखेर जिम्मेवार लोकतान्त्रिक तथा राष्ट्रवादी राजनीतिक शक्तिहरू परिपक्व सहकार्य र दूरदृष्टिका साथ अघि बढ्नुपर्ने बताए । लोकतन्त्रमा विचारको भिन्नता स्वाभाविक भए पनि त्यसलाई विभाजनको आधार नभई साझा निष्कर्षमा पुग्ने अवसरका रूपमा लिनुपर्ने उनको धारणा थियो ।
उनले वीपी कोइरालाले प्रतिपादन गरेको राष्ट्रिय मेलमिलापको नीति संवाद, सहिष्णुता र सहकार्यमा आधारित रहेको उल्लेख गर्दै काँग्रेसले त्यसलाई व्यवहारमा उतार्नुको विकल्प नरहेको बताए । नेतृत्वले सबै नेता–कार्यकर्ताको स्वाभिमानको सम्मान गर्दै विश्वासको वातावरण निर्माण गर्न सके मात्रै पार्टी थप एकताबद्ध बन्ने उनको भनाइ थियो ।
उनले भने, “पार्टीभित्र देखिएका असन्तुष्टि, मतभेद र विवाद समयमै सम्बोधन गर्नुपर्छ । अन्यथा पार्टी एकतामा क्षति पुग्यो वा विभाजनको अवस्था आयो भने त्यसको राजनीतिक तथा नैतिक जिम्मेवारी वर्तमान नेतृत्वले लिनुपर्छ ।”
कोइरालाले वीपी स्मृति दिवसका अवसरमा पार्टीका नेता, कार्यकर्ता र शुभेच्छुकलाई एकता सुदृढ गर्दै लोकतान्त्रिक मूल्य–मान्यता र राष्ट्रिय मेलमिलापको भावनाअनुसार अघि बढ्न आह्वान गरे ।
