काठमाडौं । नेपाली कांग्रेसका पूर्वमहामन्त्री कृष्णप्रसाद सिटौलाले पार्टीभित्र एकताको वातावरण बनाउन सभापति गगन थापालाई आग्रह गरेका छन् । ४४औं बीपी स्मृति दिवसको अवसरमा प्रज्ञा भवनमा आयोजित इतर पक्षको कार्यक्रममा बोल्दै सिटौलाले थापालाई साहसका साथ पार्टी एकताको पहल गर्न आग्रह गरेका हुन् ।
‘अझै पनि भन्न चाहन्छौं, गगन थापा तपाईं साहसी बन्नुस्, अकपट बन्नुस् । असंकोच र खुला मनले “मैले कांग्रेस जोडें” भन्ने आँट गर्नुस्,’ सिटौलाले भने । उनले थापालाई पार्टी एकताका लागि अवरोध गर्ने तत्वसँग सम्झौता नगर्न पनि सुझाव दिए ।
‘तपाईंलाई जसले रोक्छ, त्यसलाई धकेल्नुस् । तपाईंको अभियानमा साथ दिन नआउनेलाई पछि नलाग्नुस् । यति आँट छैन तपाईंमा ?’ उनले प्रश्न गरे ।
सिटौलाले इतर पक्षले कुनै किसिमको छलछाम नगरेको दाबी पनि गरे । उनले पार्टीको नयाँ कार्यदिशाबारे छलफल गर्न महिनाको अन्त्यसम्म राष्ट्रिय भेला आयोजना गर्ने तयारी भइरहेको जानकारी दिए ।
‘हामी कुनै छलछाम गरिरहेका छैनौं । यो महिनाको अन्तिमसम्म पुग्दा एउटा राष्ट्रिय भेला हुन्छ र त्यहीँबाट नयाँ कार्यदिशा तय हुन्छ,’ उनले भने ।
उनका अनुसार इतर पक्षले आफ्ना धारणा र आगामी योजनाबारे स्पष्ट रूपमा जानकारी दिइरहेको छ ।
