काठमाडौं । कृषि, वन तथा पर्यावरणमन्त्री गीता चौधरीले जलवायु–स्मार्ट कृषि विस्तारका लागि अन्तर्राष्ट्रिय सहयोग आवश्यक रहेको बताएकी छन्।
सरकारले कृषिको आधुनिकीकरण र जलवायु–स्मार्ट प्रविधिमार्फत उत्पादन बढाउने लक्ष्य लिएको भन्दै उनले त्यसका लागि चीन सरकार, चाइना इन्टरनेसनल डेभलपमेण्ट कोअपरेशन एजेन्सी (सिडका), संयुक्त राष्ट्रसंघीय खाद्य तथा कृषि संगठन (एफएओ) तथा अन्य विकास साझेदारको सहयोग आवश्यक रहेको बताइन्।
नेपालको कृषि क्षेत्र न्यून उत्पादकत्व, जलवायु परिवर्तनको बढ्दो असर, प्राकृतिक विपद्, कृषिमा आश्रित युवा जनशक्तिको वैदेशिक पलायन तथा आधुनिक प्रविधि र बजारसम्मको सीमित पहुँचजस्ता संरचनागत चुनौतीबाट प्रभावित रहेको उनले बताइन् । अन्तर्राष्ट्रिय मान्यता प्राप्त आधुनिक परीक्षण प्रयोगशालाको अभावका कारण कृषि उपजको निर्यातमा समस्या रहेको उल्लेख गर्दै सरकारले त्यस्ता प्रयोगशालाको निर्माण र विस्तारलाई उच्च प्राथमिकतामा राखेको जानकारी दिइन् ।
‘यस लक्ष्यमा चीन सरकार, सिडका तथा एफएओलगायत दातृ राष्ट्र एवं संस्थाहरूबाट सहयोगको अपेक्षा गर्दछु,’ मन्त्री चौधरीले भनिन् ।
उनले चीन सरकार, सिडका र एफएओको सहयोगमा सुरु भएको नेपाल कृषि खाद्य प्रणाली सुदृढीकरण परियोजना सरकारको कृषि आधुनिकीकरण, व्यवसायीकरण र दिगो विकाससम्बन्धी राष्ट्रिय प्राथमिकतासँग प्रत्यक्ष रूपमा जोडिएको बताइन् । जलवायु–स्मार्ट कृषि अभ्यासको प्रवर्द्धन, पोषण सुधार, बजार पहुँच विस्तार र स्थानीय संस्थागत क्षमता सुदृढीकरणमार्फत परियोजनाले नेपालको कृषि तथा खाद्य प्रणालीलाई थप सक्षम र दिगो बनाउन योगदान पुग्ने विश्वास पनि उनले व्यक्त गरिन् ।
मन्त्री चौधरीले चीनसँग नेपालको सम्बन्ध ऐतिहासिक, सौहार्दपूर्ण र समस्यारहित रहेको उल्लेख गर्दै कृषि आधुनिकीकरण र गरिबी न्यूनीकरणमा चीनले हासिल गरेको अनुभव नेपालका लागि उपयोगी हुने बताइन् । ज्ञान, प्रविधि र असल अभ्यासको आदान–प्रदानले कृषि क्षेत्रको रूपान्तरणमा महत्त्वपूर्ण भूमिका खेल्ने उनको भनाइ थियो ।
