काठमाडौँ । नेकपा (एमाले) का महासचिव शंकर पोखरेलले संसदीय दलका सदस्यलाई उनीहरूको रुचि, ज्ञान र दक्षताका आधारमा जिम्मेवारी दिनुपर्ने बताएका छन् ।
आइतबार च्यासलस्थित पार्टी कार्यालयमा आयोजित कार्यक्रममा उनले सबै सांसद सबै विषयमा समान रूपमा दक्ष नहुने भएकाले विषयगत ज्ञान भएका सदस्यलाई प्राथमिकता दिँदा मात्रै संसदमा पार्टीको प्रस्तुति प्रभावकारी हुने बताए ।
उनले विषयवस्तुमा दख्खल नभएका सदस्यलाई जबर्जस्ती बोल्न लगाउँदा अपेक्षित प्रभाव नपर्ने उल्लेख गर्दै ठूलो पदमा भएकै आधारमा बोल्ने अवसर दिने प्रवृत्तिले कतिपय अवस्थामा विषयवस्तु नै ओझेलमा पर्ने बताए ।
पोखरेलले सूचना र प्रविधिको युगमा ज्ञानसँगै प्रस्तुति शैली पनि महत्वपूर्ण हुने भएकाले जिम्मेवारी बाँडफाँट गर्दा दक्षतालाई आधार बनाउनुपर्ने बताए। नागरिकको जीवनस्तर र बढ्दो आकांक्षाअनुसार मुलुकको आर्थिक वृद्धि हुन नसक्दा पार्टी र जनताबीच केही दूरी सिर्जना भएको पनि उनले उल्लेख गरे ।
