काठमाडौँ । भारत र श्रीलंकामा संयुक्त रूपमा आयोजना हुने आइसिसी मेन्स टी-२० विश्वकपका लागि नेपालको बलिङ कन्सल्ट्यान्टमा अस्ट्रेलियाका इयान हार्भी नियुक्त भएका छन्।
उनी पूर्वअष्ट्रेलियन क्रिकेट खेलाडी तथा ग्लामोर्गन टिमका सहायक प्रशिक्षक हुन्।
माघ तेस्रो सातादेखि भारत र श्रीलंका हुने आइसिसी टी-२० विश्वकप २०२६ को तयारी नेपालले श्रीलंका र भारतमा गर्दैछ।
हाल रुपन्देहीको एक्स्ट्राटेक ओभलमा अभ्यास गरिरहेको नेपालले सुरुमा श्रीलंका जानेछ। त्यसपछि अन्तिम तयारी गर्न नेपाली टोली भारतको मुम्बईमा जाने नेपाल क्रिकेट संघ (क्यान) को भनाइ छ।
नेपाली टोलीले श्रीलंकाको ‘ए’ टोली र भारतको मुम्बई मुम्बई क्रिकेट एसोसिएसनको टोलीसँग विभिन्न खेलहरू खेल्ने कार्यक्रम रहेको छ।
नेपाली टोली अर्को साता श्रीलंका जाने कार्यक्रम छ। त्यहाँ नेपालले माघ ६ गते पहिलो अभ्यास खेल खेल्नेछ। त्यहाँ एक साता अभ्यास गरेपछि नेपाली टोली मुम्बई आउनेछ। मुम्बईमा पहिलो अभ्यास खेल माघ १५ मा खेल्नेछ।
