साफ महिला क्लब च्याम्पियनसिपको ‘महाभिडन्त’: इतिहास बदल्ने एपीएफको दाउ, दबदबा कायम राख्ने इस्ट बंगालको सुर
त्रिपुरेश्वरस्थित दशरथ रंगशाला शनिबार साँझ एक ऐतिहासिक र ‘हाई-भोल्टेज’ फाइनलको साक्षी बन्दैछ । साफ क्लब महिला च्याम्पियनसिपको उपाधि भिड़न्तमा घरेलु फुटबलको पावरहाउस एपीएफ फुटबल क्लब र भारतीय फुटबलको विरासत बोकेको इस्ट बंगाल एफसी आमनेसामने हुँदैछन् ।
साँझ ५ः०० बजे जब रेफ्रीको सिट्टी बज्नेछ, तब रंगशालामा केवल खेल मात्र होइन, दुई देशका उत्कृष्ट क्लबहरू बीचको रणनीतिक युद्ध सुरु हुनेछ ।
लिग चरणमा अपराजित रहँदै, १० अंकको सानदार नतिजासहित शीर्ष स्थानमा रहेको इस्ट बंगाल आफ्नो दबदबा कायम राख्न चाहन्छ । उता, समूह चरणमा उतारचढावका बाबजुद ८ अंक जोडेर फाइनलमा स्थान पक्का गरेको एपीएफ, घरेलु मैदानमा दर्शकको साथ लिएर नयाँ इतिहास रच्ने दाउमा छ ।
इस्ट बंगालको रणनीति: आक्रमण र फिनिसिङमा सुधार केही दिनअघि मात्रै समूह चरणको अन्तिम खेलमा यी दुई टोली भिड्दा नतिजा बराबरीमा टुंगिएको थियो । इस्ट बंगालका मुख्य प्रशिक्षक एन्टोनी एन्ड्रुजलाई राम्रोसँग थाहा छ– त्यो दिन सिर्जना भएका दर्जनौँ अवसर गोलमा परिणत हुन सकेका थिएनन् । त्यसैले, फाइनलका लागि उनको अर्जुनदृष्टि ‘क्लिनिकल फिनिसिङ’ मा छ ।
शुक्रबारको प्रिम्याच कन्फरेन्समा प्रशिक्षक एन्ड्रुज निकै विश्वस्त देखिए । उनले भने, “हामी एपीएफलाई कमजोर आँक्ने भूल गर्ने छैनौँ । समूह चरणको नतिजा इतिहास भइसक्यो । फाइनलमा तपाईंले इस्ट बंगालको बिल्कुलै फरक र आक्रामक रूप देख्नुहुनेछ । हाम्रो मनोबल उच्च छ, र यसपटक सिर्जना भएका अवसरहरू खेर जाने छैनन् ।”
यता, इस्ट बंगालकी कप्तान फजिला इक्वापुतले घरेलु समर्थकको भीडलाई चुनौती नभई अवसरको रूपमा लिएकी छिन् । उनले निडर हुँदै भनिन्, “घरेलु टोलीविरुद्ध खेल्दा दबाब हुनु स्वभाविक हो, तर हाम्रो ध्यान ग्यालरीको होहल्लामा होइन, मैदानभित्रको ९० मिनेटमा केन्द्रित छ ।”एपीएफको अग्निपरीक्षा: एपीएफका लागि यो फाइनल केवल उपाधि जित्ने खेल मात्र होइन, दशरथ रंगशालामा नेपाली टोलीले फाइनलमा बारम्बार बेहोर्दै आएको हारको नमीठो इतिहास बदल्ने अवसर पनि हो ।
एपीएफका मुख्य प्रशिक्षक जीवेशकुमार पाण्डेले आफ्नो टोली ‘गर वा मर’ को स्थितिमा लड्न शारीरिक र मानसिक रूपमा तयार रहेको बताए । “लिग चरणमा हाम्रो अग्रपंक्तिमा केही कमजोरी थियो, तर दुई दिनको विश्रामलाई भरपुर सदुपयोग गरेको जानकारी दिए । । हामी इस्ट बंगालको हर चुनौतीको सामना गर्न तयार छौँ,” पाण्डेले दृढता व्यक्त गरे ।
टोलीकी कप्तान तथा स्टार खेलाडी अनिता बस्नेतको अभिव्यक्तिमा भने गहिरो राष्ट्रप्रेम झल्कियो । उनले यो खेललाई क्लबको जर्सी लगाएर राष्ट्रका लागि लडिने युद्धको संज्ञा दिइन् ।
“हामी यहाँ क्लबको मात्र होइन, सिंगो राष्ट्रको प्रतिनिधित्व गरिरहेका छौँ,” अनिताले भावुक हुँदै भनिन्, “दशररथ रंगशालामा फाइनल हार्दाको पीडा हामीले धेरैपटक भोगेका छौँ । यसपटक त्यो इतिहास बदल्न र ट्रफी उचाल्न हामी आतुर छौँ ।”
अनिताले यो मञ्च खेलाडीको भविष्यका लागि पनि ‘सुनौलो ढोका’ भएको बताइन् । “विश्वको नजर हामीमाथि छ । यहाँको उत्कृष्ट प्रदर्शनले हाम्रा खेलाडीहरूलाई विदेशी लिगको ढोका खोल्न सक्छ,” उनले थपिन् ।
एकातिर भारतीय फुटबलको प्राविधिक उत्कृष्टता, अर्कोतिर नेपाली टोलीको अदम्य साहस र घरेलु मैदानको जोस । के एपीएफले इतिहास बदल्ला ? वा इस्ट बंगालले ट्रफी लिएर जानेछ ? दुवै टोलीले क्षेत्रीय सर्वोच्चता कायम गर्ने लक्ष्य राखेकाले शनिबारको फाइनल खेल दर्शकका लागि निकै रोमाञ्चक बन्ने पक्का छ ।
