काठमाडौँ । नेपाली कांग्रेसका सभापति गगन थापाले छठ पर्वको अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति, समृद्धि र सुस्वास्थ्यको शुभकामना व्यक्त गरेका छन् ।
छठ पर्वका अवसरमा शुभकामना सन्देश जारी गर्दै सभापति थापाले सूर्य उपासना, प्रकृतिप्रतिको श्रद्धा र कृतज्ञताको प्रतीकका रूपमा रहेको यस पर्वले समाजमा आपसी सद्भाव, एकता र सकारात्मक ऊर्जा प्रवाह गर्ने विश्वास व्यक्त गरेका हुन् ।
उनले छठ पर्वको आध्यात्मिक सम्बन्ध प्राचीन वैदिक परम्परासँग जोडिएको उल्लेख गर्दै ऋग्वेदमा प्रकाश, ऊर्जा र नवजीवनकी प्रतीक उषा देवीको स्तुति गरिएको स्मरण गरेका छन् ।
थापाले वैदिक परम्परामा उषा देवीको आराधना र सूर्य उपासनाको प्राचीन आध्यात्मिक भाव आजको छठ पर्वमा समेत प्रतिबिम्बित भएको बताएका छन् ।
अस्ताउँदो र उदाउँदो सूर्यलाई अर्घ्य अर्पण गर्दै सूर्यदेव तथा छठी मैयाको पूजा गरिने यस पर्वले प्रकृतिको सम्मान, जीवनप्रतिको कृतज्ञता र अन्धकारबाट उज्यालोतर्फ अघि बढ्ने प्रेरणा दिने उनको भनाइ छ ।
उनले छठी मैयाको कृपाले सबैको जीवनमा सुख, शान्ति, समृद्धि र सुस्वास्थ्य कायम रहोस् भन्दै यस पर्वले सामाजिक सद्भाव र राष्ट्रिय एकतालाई थप सुदृढ बनाउने विश्वास व्यक्त गरेका छन् ।
