काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले पार्टीको राजनीतिक प्रभाव पुनः स्थापित गर्न आन्दोलन र निर्वाचनमा आफ्नो शक्ति प्रदर्शन गर्नुपर्ने बताएका छन्। उनले आगामी निर्वाचन र राजनीतिक आन्दोलनका लागि तयार रहन पार्टीका नेता तथा कार्यकर्तालाई निर्देशन दिएका छन्।
एमाले वाग्मती प्रदेश कमिटीको बैठकमा बोल्दै ओलीले एमाले देशको सही विचार बोकेको, संगठित, प्रभावकारी र उज्ज्वल भविष्य भएको पार्टी हो भन्ने स्थापित गर्नुपर्ने बताए। केन्द्रीय कमिटीले आन्दोलन र निर्वाचनलाई प्रमुख कार्यभारका रूपमा अघि सारेको उल्लेख गर्दै उनले सबै जनवर्गीय, पेसागत तथा सामुदायिक संगठनलाई सक्रिय बनाउन निर्देशन दिए।
‘नेकपा एमाले सिद्धियो भन्ने कुरा होइन भनेर देखाउन आन्दोलन र निर्वाचनबाट फेरि हामीले आफ्नो शक्ति देखाउनुपर्छ,’ उनले भने।
ओलीले पार्टीका कुनै पनि जनसंगठन शिथिल हुन नहुने भन्दै कार्यकर्तामा पार्टीप्रतिको निष्ठा कमजोर देखिएको टिप्पणी गरे। पार्टीप्रतिको निष्ठा सर्त र स्वार्थमा आधारित हुन नहुने उनको भनाइ थियो।
विशेषगरी वाग्मती प्रदेशमा एमालेको संगठनात्मक अवस्था कमजोर भएको उल्लेख गर्दै उनले त्यसलाई सुधारेर प्रदेशलाई एमालेको बलियो आधार बनाउनुपर्ने बताए। विगतमा राजधानीसहित वाग्मतीका विभिन्न क्षेत्रमा पार्टीको प्रभाव रहेको स्मरण गर्दै उनले अहिलेको कमजोर अवस्थालाई अन्त्य गर्नुपर्नेमा जोड दिए।
उनले पछिल्लो समय जनताले उम्मेदवार तथा राजनीतिक नेतृत्वको पृष्ठभूमि, इतिहास, विचार, चरित्र र आचरणको मूल्यांकन नगरी लहैलहैमा लाग्ने गरेको आरोप लगाए। यस्तो प्रवृत्तिबाट जनतालाई सचेत गराउनु पार्टी कार्यकर्ताको जिम्मेवारी भएको उनको भनाइ थियो।
आगामी राजनीतिक गतिविधिमा युवाको परिचालनलाई विशेष प्राथमिकता दिन निर्देशन दिँदै ओलीले युवालाई पार्टीमा संगठित गरेर सक्रिय कार्यकर्ताका रूपमा परिचालन गर्नुपर्ने बताए। युवालाई परिचालन गर्न नसके राजनीतिक सफलता हासिल गर्न कठिन हुने उनले उल्लेख गरे।
