मकवानपुर। मकवानपुरगढी गाउँपालिका–८ बुढीचौरमा बेमौसमी हावाहुरीले गोलभेँडा खेतीमा ठूलो क्षति पुर्याएपछि किसानहरू लगानी डुब्ने चिन्तामा परेका छन् ।
असोज १० गते वर्षासँगै आएको हावाहुरीले उत्पादन दिने तयारीमा रहेका गोलभेँडाका बोटसहित टनेलमा क्षति पुर्याएको हो । ऋणधन गरेर बनाएका टनेल र खेती नष्ट भएपछि किसानलाई लगानी उठाउनै समस्या भएको छ ।
स्थानीय शम्सेर ल्वागुनले तरकारी मण्डीका साहुसँग ५० हजार रुपैयाँ ऋण लिएर गोलभेँडा खेती गरेका थिए । पुख्र्यौली आरन पेसा छाड्दै कृषिमा लागेका उनले गत वर्ष चारवटा टनेलबाट १ लाख ५० हजार रुपैयाँ आम्दानी गरेका थिए । यसपटक भने हावाहुरीले तीनवटा टनेल पूर्ण रूपमा नष्ट गरिदिएको छ भने एउटामा आंशिक क्षति पुगेको छ । उत्पादन दिने बेलामा बोट नै ढलेपछि ऋण कसरी तिर्ने भन्ने चिन्ता उनलाई छ ।
बुढीचौरमा ल्वागुन मात्रै होइन, अधिकांश किसानको गोलभेँडा खेती प्रभावित भएको छ । अच्युत घलानको करिब तीन सय मिटर लामो टनेल र सुजन पुडासैनीले भाडामा लिएको करिब २५ रोपनी जग्गामा गरिएको खेतीमा पनि ठूलो क्षति पुगेको छ । स्थानीय कर्मराज विश्वकर्माका अनुसार वडा नम्बर ८ को बर्गिटार र दम्पकी क्षेत्रका अधिकांश टनेलमा हावाहुरीले क्षति पुर्याएको छ ।
टनेलसँगै बोटसमेत ढलेपछि किसानले खेतीमा गरेको ज्यालासम्म उठाउन नसक्ने अवस्था आएको उनले बताए । क्षतिग्रस्त टनेल मर्मत गर्नुका साथै रोगको संक्रमण रोक्न औषधि प्रयोग गर्नुपर्ने भएकाले किसानमाथि थप आर्थिक भार परेको छ ।
वडा कार्यालयले संकलन गरेको प्रारम्भिक विवरणअनुसार हालसम्म ३५ घरधुरीका करिब ७ हजार मिटर टनेलमा गरिएको गोलभेँडा खेतीमा क्षति पुगेको छ । राम्रो उत्पादन हुने समयमा बुढीचौरबाट दैनिक ४ सयदेखि ६ सय क्रेटसम्म गोलभेँडा बजार पठाइँदै आएको थियो । यस वर्ष हावाहुरीका कारण ७० टनभन्दा बढी उत्पादन घट्ने प्रारम्भिक अनुमान छ ।
क्षतिको विवरण बुझाउन वडा कार्यालय पुग्ने किसानको संख्या बढिरहेकाले नोक्सानीको वास्तविक आँकडा अझै बढ्न सक्ने देखिएको छ ।
