काठमाडौं। राष्ट्रिय स्वतन्त्र पार्टी (रास्वपा) का महामन्त्री एवं सांसद विपिन आचार्यले सरकारी संयन्त्रमा व्याप्त सरुवा–बढुवाको अस्वस्थ अभ्यास अन्त्य गर्न स्वायत्त सरुवा बोर्ड गठन गर्न सरकारसँग माग गरेका छन्।
बिहीबार प्रतिनिधिसभा बैठकमा बोल्दै आचार्यले राजनीतिमा आएपछि आफूले सबैभन्दा बढी दबाब सरुवा र बढुवाकै विषयमा झेल्नुपरेको बताए। सुशासन र पारदर्शिताको कुरा गर्नेहरू समेत व्यक्तिगत स्वार्थका लागि नातावाद र कृपावाद खोज्दै आउने गरेको उनको भनाइ थियो।
‘राजनीतिमा आएपछि मैले सबैभन्दा बढी झेलेको समस्या नै सरुवा र बढुवाको हो,’ आचार्यले भने।
यस्ता आग्रहलाई आफूले विधि र पद्धतिभन्दा बाहिर गएर सम्बोधन गर्न नसक्ने उनले बताए। रास्वपाको वाचापत्रमा स्वायत्त सरुवा बोर्ड गठन गर्ने प्रतिबद्धता रहेको स्मरण गराउँदै उनले निश्चित विधि र पूर्वानुमानका आधारमा काम गर्ने गरी बोर्ड गठन गर्नुपर्ने माग गरे।
‘हाम्रो वाचापत्रको बुँदा नम्बर ८ मा स्वायत्त सरुवा बोर्ड गठन गर्ने उल्लेख छ। सरकारले यो बोर्ड जतिसक्दो चाँडो गठन गर्नुपर्छ,’ उनले भने।
सरुवा–बढुवाको समस्या समाधान नभए आगामी दसैँमा आफन्तबाट टीका र आशीर्वादभन्दा ‘सराप’ पाउने अवस्था आउन सक्ने भन्दै उनले व्यंग्य गरे। ‘यो सरापबाट मलाई बचाइदिनुपर्यो सरकार,’ उनले भने।
