काठमाडौं। भोटेकोशी बाढीका कारण जलविद्युत क्षेत्रमा ४१० मेगावाट विद्युत् उत्पादन क्षमता गुमेको छ भने ८ सयभन्दा बढी व्यक्ति अझै सम्पर्कविहीन रहेको सरकारले जनाएको छ।
बुधबार प्रतिनिधिसभाको बैठकमा ऊर्जा, जलस्रोत तथा सिँचाइमन्त्री विराजभक्त श्रेष्ठले विपद्बाट ऊर्जा क्षेत्रमा प्रारम्भिक रूपमा ३ खर्ब ९० अर्ब रुपैयाँभन्दा बढीको क्षति भएको जानकारी दिए। उनका अनुसार नेपाल विद्युत् प्राधिकरणका ४७ सहित ८ सयभन्दा बढी कर्मचारी तथा कामदार बेपत्ता छन्।
‘ऊर्जा क्षेत्रमा करिब ३ खर्ब ९० अर्ब रुपैयाँभन्दा बढीको क्षति भएको प्रारम्भिक विवरण छ,’ मन्त्री श्रेष्ठले भने।
माथिल्लो त्रिशूली–१, त्रिशूली–३ ए, रसुवागढीलगायत आयोजनामा मानवीय तथा भौतिक क्षति भएको उनले बताए। खोज तथा उद्धारबाट केहीको सकुशल उद्धार भए पनि ठूलो संख्या अझै सम्पर्कविहीन रहेको मन्त्रालयले जनाएको छ।
बाढीबाट ११ जलविद्युत् केन्द्र बन्द हुँदा राष्ट्रिय प्रसारण प्रणालीबाट ४१० मेगावाट विद्युत् बाहिरिएको छ। निर्माणाधीन ६ आयोजनामा पनि गम्भीर क्षति पुगेको छ। सबस्टेसन तथा प्रसारण लाइनमा भएको क्षतिले राष्ट्रिय ग्रिड प्रभावित भएको छ भने सिँचाइ र नदी नियन्त्रण संरचना पुनःस्थापनाका लागि मात्रै करिब ५ अर्ब रुपैयाँ आवश्यक पर्ने मन्त्रालयको आकलन छ।
सरकारले बेपत्ता प्राधिकरण कर्मचारीका आश्रित परिवारलाई तत्काल ५ लाख रुपैयाँ राहत र ६ महिनासम्म आधा तलब उपलब्ध गराउने जनाएको छ। बाढी प्रभावित ग्राहकलाई न्यूनतम महसुल मिनाहा, निःशुल्क मिटर तथा विशेष सहुलियतको व्यवस्था गरिएको छ।
प्रभावित क्षेत्रमा वैकल्पिक ऊर्जामार्फत विद्युत् सेवा सञ्चालनको प्रयास भइरहेको र रसुवा, नुवाकोटलगायत जिल्लामा सेवा पुनःस्थापना गरिएको मन्त्री श्रेष्ठले बताए। सेना, प्रहरी तथा निजी क्षेत्रसँगको समन्वयमा खोज, उद्धार र पुनःस्थापनाको काम तीव्र पारिएको उनको भनाइ छ।
