काठमाडौं। राष्ट्रिय स्वतन्त्र पार्टी (रास्वपा)की सांसद तथा जेन–जी आन्दोलनकी शहीदकी आमा रचना खतिवडाले शहीद परिवारले न्याय कहिले पाउने भन्दै सरकारसँग प्रश्न गरेकी छन् । उनले शहीद परिवार र आन्दोलनका क्रममा घाइते भएकाहरूका माग तत्काल सम्बोधन गर्नसमेत सरकारसँग आग्रह गरेकी छन् ।
प्रतिनिधिसभाको बुधबारको बैठकमा बोल्दै खतिवडाले जेन–जी शहीदको स्मृतिमा मंगलबार काठमाडौंमा आयोजित कार्यक्रममा प्रधानमन्त्री बालेन्द्र साह सहभागी नभएको भन्दै असन्तुष्टि जनाइन् । शहीदका विषयमा बोलिदिन आग्रह गर्दागर्दै प्रधानमन्त्रीले साँझ मात्र सामाजिक सञ्जालमार्फत श्रद्धाञ्जली दिएको उनको भनाइ थियो ।
‘शहीदले न्याय कति वर्षपछि पाउँछ सरकार ? शहीद परिवार र घाइते परिवारलाई भेट्न कति वर्ष लाग्छ अब ?’ उनले प्रश्न गरिन् ।
उनले जेन–जी आन्दोलनका शहीद परिवार तथा घाइतेको माग सम्बोधन गर्न सरकार गम्भीर हुनुपर्ने बताइन् । शहीदका परिवारले न्याय र राज्यको साथ खोजिरहेको भन्दै उनले उनीहरूलाई लामो समयसम्म बेवास्ता नगर्न सरकारको ध्यानाकर्षण गराइन् ।
