रसुवा। पृथ्वी राजमार्गअन्तर्गत मुग्लिङ–मलेखु सडक खण्डको कृष्णभीरमा भित्ता काटेर ट्रयाक खोल्ने काम अन्तिम चरणमा पुगेको छ । शुक्रवारदेखि सुरु भएको काम सकेर शनिवार साँझसम्म नागढुंगा–मुग्लिङ सडक सञ्चालनमा ल्याउने तयारी गरिएको छ ।
निर्माण व्यवसायीले नेपाल जियोटेक सोसाइटीका प्राविधिक, सडक विभागका प्रतिनिधि र विज्ञको रोहवरमा भित्ता काट्ने काम अघि बढाएका हुन् । निर्माण व्यवसायी महासंघका उपाध्यक्ष शहदेव खड्काका अनुसार कृष्णभीरको मुग्लिङतर्फ स्काभेटर चलाउन १ सय ५० मिटर ट्रयाक खोलिसकिएको छ । मलेखुतर्फ करिब १ सय मिटर खुलेको र बाँकी करिब ५० मिटर शनिवार खोल्ने तयारी छ ।
‘हामी अहोरात्र खटेर काम गरिरहेका छौँ,’ खड्काले भने, ‘अब ५० मिटर जति मात्रै हाम्रो बाँकी रहेको छ ।’
उनका अनुसार रातिको समयमा समेत प्राविधिक, अपरेटर, इन्जिनियर र कर्मचारी परिचालन गरेर काम भइरहेको छ । अस्थायी रूपमा भए पनि सडकलाई व्यवस्थित बनाएर सञ्चालनमा ल्याउने तयारी रहेको उनले बताए । सडक पूर्ण रूपमा सञ्चालनमा नआएसम्म यात्रुलाई वैकल्पिक मार्ग प्रयोग गर्न आग्रह गर्दै उनले हतारमा सडक खुलाएर पुनः बन्द हुने अवस्था आउन नहुने बताए ।
गत भदौ १० गतेदेखि आएको त्रिशूलीको बाढीले कृष्णभीर, परेवाभीरलगायत विभिन्न स्थानमा सडक कटान गरी बगाएपछि पृथ्वी राजमार्ग अवरुद्ध छ । सडक बन्द हुँदा पश्चिम क्षेत्रबाट काठमाडौं प्रवेश गर्ने सवारीसाधन प्रभावित भएका छन् भने खाद्यान्नलगायत अत्यावश्यक सामग्रीको आपूर्ति पनि प्रभावित भएको छ ।
