काठमाडौं। नेकपा एमालेका प्रमुख सचेतक ऐन महरले निर्माणाधीन जलविद्युत् आयोजनाका टनेलमा फसेका नागरिकको शीघ्र उद्धार गरी जीवनरक्षालाई प्राथमिकता दिन सरकारसँग आग्रह गरेका छन् ।
बिहीबार प्रतिनिधिसभाको बैठकमा बोल्दै महरले बाढीपहिरोबाट उत्पन्न संकट सामना गर्न सरकारलाई निःसर्त साथ दिने बताए । आफ्नो गृहजिल्ला बझाङका दुई इन्जिनियरसमेत जलविद्युत् आयोजनाको टनेलमा फसेको र उनीहरूको अवस्था अझै अज्ञात रहेको उनले जानकारी दिए ।
‘उहाँहरूको छिटोभन्दा छिटो उद्धार गरियोस्,’ महरले भने, ‘उनीहरूको खोजीमा समेत सरकारले ध्यान देओस् ।’
उनले बाढी प्रभावित क्षेत्रका नागरिकको स्वास्थ्यप्रति पनि सरकार गम्भीर हुनुपर्ने बताए ।
