खोटाङ । खोटाङबाट सिन्धुली हुँदै काठमाडौं आवतजावत गर्ने सार्वजनिक यातायात सेवा अर्को सूचना जारी नभएसम्मका लागि बन्द गरिएको छ।
सिन्धुलीको सुनकोसी गाउँपालिका–२ नवलपुरमा बसको ठक्करबाट कार सुनकोसी नदीमा खसेर तीन जना बेपत्ता भएको घटनापछि पीडित पक्षले मध्यपहाडी लोकमार्ग अवरुद्ध गरेसँगै यातायात व्यवसायीले सेवा स्थगित गरेका हुन्।
घटना साउन १८ गते भएको हो। सडक किनारमा रोकिएको कारलाई काठमाडौंबाट ओखलढुंगातर्फ जाँदै गरेको बागमती प्रदेश ०८–००१०–०१४४ नम्बरको बसले ठक्कर दिँदा कार करिब ३० मिटर तल सुनकोसी नदीमा खसेको थियो।
दुर्घटनामा सिन्धुपाल्चोकका दिलकुमार लामा, सिन्धुलीका गणेश थापा र सुजन बलमपाकी मगर बेपत्ता छन्। उनीहरूको खोजीका लागि सशस्त्र प्रहरीको गोताखोर टोली र नेपाल प्रहरी परिचालन गरिएको भए पनि हालसम्म फेला पर्न सकेका छैनन्।
पीडित पक्षले उचित क्षतिपूर्ति र दोषीमाथि कारबाहीको माग गर्दै मध्यपहाडी लोकमार्ग अवरुद्ध गरेपछि सेवा सञ्चालन गर्न असहज भएको खोटाङ यातायात प्रालिका महासचिव रामकुमार हिङमाङले बताएका छन्।
सडक अवरुद्ध भएसँगै पूर्वी जिल्लाबाट काठमाडौं आउजाउ गर्ने सयौं यात्रु समस्यामा परेका छन्। यातायात सेवा पुनः सञ्चालन हुने मिति भने हालसम्म तय गरिएको छैन।
