काठमाडौं । नेपाली कम्युनिष्ट पार्टी (नेकपा) का नेता नारायणकाजी श्रेष्ठले सरकारको कार्यशैलीका कारण राष्ट्रिय स्वाधीनता, संविधान र लोकतान्त्रिक व्यवस्थामाथि गम्भीर संकट निम्तिएको आरोप लगाएका छन् ।
पुष्पलालको ४८ औँ स्मृति दिवसका अवसरमा बिहीबार काठमाडौंमा आयोजित कार्यक्रममा उनले सरकार जनादेशविपरीत अघि बढिरहेको दाबी गर्दै संविधान संशोधनको नाममा लोकतान्त्रिक व्यवस्था र संविधानका मूल्यमान्यतामाथि प्रहार भइरहेको टिप्पणी गरे ।
‘अहिले राष्ट्रिय स्वाधीनता र लोकतान्त्रिक व्यवस्थामाथि गम्भीर संकट देखिएको छ,’ उनले भने ।
प्रधानमन्त्री बालेन्द्र साहले संसद्मा नेपालले पनि भारतको भूमि मिचेको भन्ने अभिव्यक्तिलाई ‘झुट, गैरजिम्मेवार, आपत्तिजनक र राष्ट्रघाती’ भएको टिप्पणी गर्दै श्रेष्ठले त्यसबारे प्रधानमन्त्रीले आत्मालोचना नगरेको र सत्तापक्षका नेताहरूले त्यसको बचाउ गरेको आरोप लगाए ।
समाजलाई विभाजित गर्दै राज्यलाई फासीवादउन्मुख दिशातर्फ धकेल्ने काम भइरहेको दाबी गर्दै उनले राष्ट्रिय स्वाधीनता र लोकतान्त्रिक व्यवस्थाको रक्षा अहिलेको प्रमुख चुनौती बनेको बताए ।
संविधान निर्माणमा भूमिका खेलेका प्रमुख राजनीतिक दलले संविधानको रक्षा र लोकतन्त्र सुदृढीकरणमा जिम्मेवारी निर्वाह गर्नुपर्ने उल्लेख गर्दै श्रेष्ठले राष्ट्रिय स्वाधीनताको रक्षाका लागि सबै देशभक्त र वामपन्थी शक्तिहरू एकजुट हुनुपर्ने आवश्यकता औंल्याए ।
