काठमाडौं । पूर्वप्रधानमन्त्री तथा नेपाली कम्युनिष्ट पार्टीका सहसंयोजक माधवकुमार नेपालले मुलुक विदेशी शक्तिको खेलमैदान बन्ने खतरा बढ्दै गएको बताएका छन् ।
प्रदीप नेपाल स्मृति पत्रकारिता पुरस्कार वितरण समारोहलाई बिहीबार सम्बोधन गर्दै उनले राष्ट्रिय राजनीति अपेक्षाअनुसार सकारात्मक दिशामा अघि बढ्न नसकेको टिप्पणी गरे । देशको अस्तित्व, सार्वभौमसत्ता, भौगोलिक अखण्डता र स्वतन्त्र, असंलग्न परराष्ट्र नीतिमाथि नै प्रश्न उठ्न थालेको उनको भनाइ थियो ।
‘कतै नेपाल विदेशी शक्तिहरूको प्रतिस्पर्धाको मैदान त बन्दै छैन भन्ने चिन्ता बढेको छ,’ उनले भने ।
इरान र युक्रेनलगायतका मुलुकका घटनाक्रमबाट नेपालले पाठ सिक्नुपर्ने उल्लेख गर्दै उनले बुद्धको जन्मभूमि, सगरमाथाको देश र शान्तिपूर्ण पर्यटकीय गन्तव्यका रूपमा रहेको नेपालको पहिचान जोगाउन सबै सचेत हुनुपर्ने बताए ।
नेपालले वर्तमान परिस्थितिमा आफ्नो पार्टीको काँधमा विशेष जिम्मेवारी आएको उल्लेख गर्दै राष्ट्रिय हित र असंलग्न परराष्ट्र नीतिको रक्षामा सबै राजनीतिक शक्ति एकजुट हुनुपर्ने धारणा राखे ।
सरकारका कामकारबाही, अभिव्यक्ति र निर्णयले नागरिकमा आशंका बढाएको दाबी गर्दै उनले सत्तापक्षको कार्यशैलीप्रति असन्तुष्टि जनाए ।
