काठमाडौं । नेपाली कांग्रेसका सभापति गगनकुमार थापाले अख्तियार दुरुपयोग अनुसन्धान आयोगलाई राजनीतिक हस्तक्षेपबाट मुक्त र प्रभावकारी बनाउन आवश्यक परे संविधान संशोधन गर्न पनि कांग्रेस तयार रहेको बताएका छन् ।
४४ औँ वीपी स्मृति दिवसका अवसरमा बिहीबार आयोजित कार्यक्रममा उनले अख्तियारलाई थप स्वतन्त्र र विश्वासयोग्य बनाउन संरचनागत सुधार आवश्यक भए त्यसबारे छलफल गर्न कांग्रेस तयार रहेको बताए ।
‘अख्तियारलाई अझ सक्षम, स्वतन्त्र र प्रभावकारी बनाउन आवश्यक परे संविधान संशोधन गर्न पनि हामी तयार छौं,’ उनले भने ।
थापाले वर्तमान सरकारले संविधानको पालना गरिरहेको छ वा छैन भन्ने प्रश्न उठेको उल्लेख गर्दै प्रधानमन्त्रीसहित सबै सार्वजनिक पदाधिकारी संविधानको दायराभित्र रहनुपर्ने बताए ।
प्रधानमन्त्री, मन्त्री वा अन्य सार्वजनिक पदाधिकारीले बदनियतपूर्वक गरेका गैरकानुनी कामको अनुसन्धान गर्ने संवैधानिक जिम्मेवारी अख्तियारको भएको उल्लेख गर्दै उनले पछिल्लो समय संवैधानिक संस्थाहरू अपेक्षाअनुसार प्रभावकारी हुन नसकेको टिप्पणी गरे ।
गल्ती गर्ने जोसुकैमाथि पनि अख्तियारले निष्पक्ष छानबिन गर्छ भन्ने विश्वास नागरिकमा हुनुपर्ने उल्लेख गर्दै थापाले आयोगलाई राजनीतिक प्रभावबाट मुक्त, स्वायत्त र बलियो बनाउन कांग्रेस प्रतिबद्ध रहेको बताए । आवश्यक परे आयोगका पदाधिकारीको संख्या बढाउने विषयमा पनि छलफल गर्न सकिने उनको भनाइ थियो ।
