काठमाडौं । प्रमुख प्रतिपक्षी दल नेपाली काँग्रेसका उपसभापति विश्वप्रकाश शर्माले नेपाली समाजमा बढ्दो निराशा र असन्तुष्टिसँग जुध्न सरकार र प्रतिपक्ष सँगसँगै उभिनुपर्ने बताएका छन् ।
मंगलवार काठमाडौंमा पार्टीका महामन्त्री गुरु घिमिरेले लेखेका ‘बुद्ध, वीपी र आजका नेता’ तथा ‘लिलिपुटका लघुमानव’ पुस्तकको विमोचन समारोहलाई सम्बोधन गर्दै शर्माले आत्मदाहजस्ता गम्भीर घटनालाई राजनीतिक आरोप–प्रत्यारोपको विषय नबनाई सरकार र प्रतिपक्ष मिलेर समाधान खोज्नुपर्नेमा जोड दिए ।
उनले हालै गणेश नेपालीको आत्मदाहको घटनालाई सरकारलाई दोष दिने वा राजनीतिक बहसको विषय बनाउनु उपयुक्त नहुने बताए । प्रेम आचार्यको आत्मदाहको घटना स्मरण गर्दै उनले नागरिकमा देखिएको असन्तुष्टि र निराशा अझै कम हुन नसकेको उल्लेख गरे ।
“केही दिनअघि गणेश नेपालीको आत्मदाहको घटना भयो । कतिपयलाई लाग्यो, गणेश नेपालीले आत्मदाह गरेपछि नेपाली काँग्रेसले यसलाई सरकारलाई घेर्ने मुद्दाका रूपमा जोडदार ढंगले उठाउँछ । तर हामीले त्यसो गरेनौँ,” शर्माले भने, “प्रेम आचार्यले पनि पुराना भनिएका दलहरूको पालामा आत्मदाह गरेका थिए । त्यसबेला पनि नागरिक किन असन्तुष्ट थिए ? आज पनि किन त्यस्तै अवस्था दोहोरिँदैछ ? हिजो हामीसँग नागरिक किन असन्तुष्ट थिए ? अहिले पनि निराशा किन बढ्दैछ ? यो एकले अर्कोलाई दोषारोपण गर्ने विषय होइन । नेपाली समाजमा यस्तो गम्भीर निराशा किन फैलिँदैछ भन्ने विषयमा गम्भीर भएर सोच्नुपर्छ । यो निराशासँग जुध्न सरकार र प्रतिपक्ष हामी सबै सँगसँगै उभिनुपर्छ ।”
शर्माले पुराना राजनीतिक दलहरूको नेतृत्वदेखि नयाँ भनिएका राजनीतिक शक्तिको नेतृत्वसम्म आइपुग्दा पनि समाजमा निराशा र असन्तुष्टि कम हुन नसकेको उल्लेख गर्दै त्यसको समाधानका लागि सरकार र प्रतिपक्षबीच साझा प्रयास आवश्यक रहेको बताए ।
