काठमाडौं । नेपाली कम्युनिष्ट पार्टीका नेता लेखनाथ दाहाल (राजन) ले रास्वपा नेता, पूर्वन्यायाधीश र पूर्वसैनिकलाई बाहेक राखेर अन्य व्यक्तिको मात्रै सम्पत्ति छानबिन गर्न नपाइने बताएका छन् । उनले सम्पत्ति छानबिन कानूनअनुसार सबै व्यक्तिमाथि समान रूपमा हुनुपर्ने धारणा राखेका छन् ।
मंगलबार काठमाडौंमा आयोजित एक कार्यक्रममा दाहालले सरकारले गठन गरेको सम्पत्ति छानबिन आयोग असंवैधानिक रहेको दाबी गरे । सम्पत्ति छानबिनका लागि अख्तियार दुरुपयोग अनुसन्धान आयोग, सम्पत्ति शुद्धीकरण विभाग, आन्तरिक राजश्व विभागलगायतका संवैधानिक तथा कानूनी निकाय रहेकाले तिनलाई प्रभावमुक्त बनाएर कानूनबमोजिम काम गर्न दिनुपर्ने उनले बताए ।
सरकारले रास्वपा नेता, पूर्वन्यायाधीश र पूर्वसैनिकलाई छाडेर अन्य व्यक्तिमाथि मात्रै सम्पत्ति छानबिन गर्न खोजेको आरोप लगाउँदै दाहालले यस्तो अभ्यास कानून र संविधानको मर्मविपरीत हुने बताए । ‘घण्टीमा भोट हाल्ने र घण्टीका नेता बाहेकलाई मात्रै छानबिन गर्नुस् भन्न पाइँदैन । कानूनले गैरकानूनी काम गर्ने जोसुकैलाई समान रूपमा कारबाहीको दायरामा ल्याउनुपर्छ,’ उनले भने ।
भ्रष्टाचार वा गैरकानूनी काममा संलग्न जोसुकै भए पनि दल, पद वा पहुँचका आधारमा छुट दिन नहुने उनको भनाइ थियो । वर्तमान सरकारले आफ्ना नेता–कार्यकर्तालाई जोगाउँदै विपक्षीमाथि मात्रै छानबिन केन्द्रित गर्न खोजेको आरोप पनि उनले लगाए ।
दाहालले वर्तमान सरकारको शासन सञ्चालन शैली असंवैधानिक, अलोकतान्त्रिक, गैरकानूनी, स्वेच्छाचारी र निरंकुश बन्दै गएको दाबी गरे । उनले लिपुलेक, लिम्पियाधुरा र कालापानी समेटिएको नेपालको चुच्चे नक्सा हटाउने प्रयास भइरहेको आरोप लगाउँदै नेपालको ऐतिहासिक तथ्य र प्रमाणले पुष्टि गरेको नक्सा कसैले चाहेर हटाउन नसक्ने बताए ।
