काठमाडौं । नेपाली काँग्रेसका उपसभापति विश्वप्रकाश शर्माले पार्टीको आगामी १५ औँ महाधिवेशनलाई सर्वसम्मत बनाउन पार्टीभित्र निरन्तर संवाद र छलफल भइरहेको बताएका छन् ।
सोमवार पार्टी केन्द्रीय कार्यालय सानेपामा आयोजित पत्रकार सम्मेलनमा उनले पार्टीको आन्तरिक जीवन र आसन्न १५ औँ महाधिवेशनको तयारीबारे स्पष्ट पारे । उनका अनुसार सभापति गगनकुमार थापा, पार्टी नेतृत्व तथा अन्य सदस्यबीच सबैको सहज सहभागिता सुनिश्चित गर्ने वातावरण निर्माणका लागि निरन्तर छलफल भइरहेको छ । महाधिवेशनमा पार्टीका सबै सदस्य सहभागी हुन सक्ने वातावरण बनाउन नेतृत्व र महामन्त्रीबीच सकारात्मक संवाद अघि बढिरहेको पनि उनले बताए ।
शर्माले भने, ‘नेपाली काँग्रेस पार्टीको आन्तरिक जीवनका विषयमा के हुँदैछ भन्नेबारे म स्पष्ट पार्न चाहन्छु । पार्टीका आदरणीय सभापति गगनकुमार थापा, सिङ्गो नेपाली काँग्रेस पार्टी र पार्टी नेतृत्वबीच नेपाली काँग्रेसको १५ औँ महाधिवेशनमा सबैलाई सहभागी हुने वातावरण सहज बनाउने उद्देश्यले संवाद र छलफल भइरहेका छन् । ती संवाद तथा छलफल सकारात्मक ढङ्गले टुङ्गिनेछन् भन्नेमा हामी विश्वस्त छौँ । आन्तरिक जीवनको सन्दर्भमा आज तपाईँहरूबाट उठ्न सक्ने जिज्ञासालाई मध्यनजर गर्दै सुरुमै यो कुरा स्पष्ट गर्न चाहन्छु ।’
पार्टीभित्र जारी संवाद र छलफल सकारात्मक निष्कर्षमा पुग्नेमा आफू पूर्ण रूपमा विश्वस्त रहेको उनले बताए । पत्रकार सम्मेलनको सुरुमै उनले पार्टीको आन्तरिक जीवन र एकताबारे सञ्चारकर्मीका जिज्ञासालाई सम्बोधन गर्दै नेतृत्व तहमा समझदारी कायम गर्ने प्रयास निरन्तर भइरहेको बताए।
