काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठले गुणस्तरीय पूर्वाधार निर्माण र आयोजना समयमै सम्पन्न गर्न इन्जिनियरहरूको भूमिका निर्णायक हुने बताएका छन् ।
आइतबार ललितपुरमा आयोजित एक कार्यक्रममा उनले सडक, पुल, जलविद्युत्, प्रसारण लाइन, सिँचाइ, खानेपानी र सूचना प्रविधिलगायतका पूर्वाधार निर्माणमा प्राविधिक जनशक्तिको महत्वपूर्ण भूमिका रहेको बताए । गुणस्तरीय, सुरक्षित र वातावरणमैत्री पूर्वाधार निर्माण सरकारको उच्च प्राथमिकतामा रहेको उनको भनाइ थियो ।
मन्त्री श्रेष्ठले जलविद्युत् उत्पादन विस्तार, राष्ट्रिय तथा अन्तरदेशीय प्रसारण सञ्जाल सुदृढीकरण, सिँचाइ प्रणालीको आधुनिकीकरण र डिजिटल पूर्वाधार विकास सरकारका प्राथमिकतामा रहेको बताए । अब आयोजनाको सफलताको मूल्याङ्कन बजेट खर्चका आधारमा मात्रै नभई समयमै सम्पन्न भएको, लागत अनुशासन कायम भएको र नागरिकले प्राप्त गरेको प्रत्यक्ष लाभका आधारमा पनि गरिने उनले उल्लेख गरे ।
ऊर्जा क्षेत्रलाई आर्थिक रूपान्तरणको प्रमुख आधार बनाउने लक्ष्य रहेको उल्लेख गर्दै मन्त्री श्रेष्ठले क्षेत्रीय विद्युत् व्यापार, नवीकरणीय ऊर्जा प्रवर्द्धन र आधुनिक प्रविधिको प्रयोगमा दक्ष इन्जिनियरहरूको योगदान महत्वपूर्ण हुने बताए । पूर्वाधार विकासलाई आर्थिक समृद्धि, सामाजिक न्याय र नागरिकको जीवनस्तर सुधारसँग जोडेर अघि बढाउनुपर्नेमा पनि उनले जोड दिए ।
