काठमाडौँ । राष्ट्रपति रामचन्द्र पौडेलले मुलुकको समृद्धि युवाको नवीन सोच र इन्जिनियरहरूको प्राविधिक दक्षतामा निर्भर रहने बताएका छन् ।
उनले युवा मस्तिष्कको नवीन सोच र इन्जिनियरहरूको प्राविधिक कौशललाई एकीकृत गर्न सके मात्रै समृद्ध नेपालको सपना साकार हुने बताए । विकासलाई भौतिक निर्माणमा मात्र सीमित नगरी जनताको कल्याणसँग जोड्नुपर्ने उल्लेख गर्दै मानव र प्रकृतिलाई विकासको केन्द्रमा राख्नुपर्नेमा उनले जोड दिए ।
उत्पादन, रोजगारी र आर्थिक गतिविधि विस्तारसँगै जलवायु परिवर्तनको चुनौतीलाई ध्यानमा राखी दिगो र वातावरणमैत्री पूर्वाधार निर्माण गर्नुपर्नेमा राष्ट्रपति पौडेलले जोड दिए । सडक, पुल र जलविद्युत् आयोजनालगायतका पूर्वाधार प्राकृतिक प्रकोप प्रतिरोधी हुनुपर्ने उनको भनाइ थियो ।
दक्ष इन्जिनियरहरू रोजगारीका लागि विदेशिने क्रम बढेकोमा चिन्ता व्यक्त गर्दै राष्ट्रपति पौडेलले युवा इन्जिनियर र आर्किटेक्टका लागि स्वदेशमै पर्याप्त अवसर, उचित मूल्याङ्कन र काममैत्री वातावरण सिर्जना गर्न सरकार र निजी क्षेत्रसँग आग्रह गरे ।
