ललितपुर । नेपाली काँग्रेसका सभापति गगनकुमार थापाले प्रदेशमा तीन ठूला दल मिलेर सरकार बनाउने प्रस्ताव जनादेश र लोकतान्त्रिक मूल्यविपरीत हुने भन्दै त्यसप्रति विमति जनाएका छन् ।
ललितपुरमा आइतबार आयोजित सन्त नेता कृष्णप्रसाद भट्टराईको शालिक अनावरण तथा ४४औँ वीपी स्मृति सप्ताहको शुभारम्भ कार्यक्रममा थापाले तीन दल मिलेर सरकार बनाउनु भनेको प्रदेशसभालाई प्रतिपक्षविहीन बनाउनु भएकाले काँग्रेसले यस्तो प्रस्ताव स्वीकार गर्न नसक्ने बताए ।
उनले सत्ताका लागि विगतमा काँग्रेसबाट पनि केही गल्ती भएको स्वीकार गर्दै अब सिद्धान्तमा सम्झौता नगर्ने स्पष्ट पारे । सत्ता नै सबैथोक भन्ने सोचले नेपाली राजनीतिलाई अस्थिर बनाएको र चुनावअघि एक दलसँग गठबन्धन गर्ने तथा चुनावपछि अर्कोसँग सरकार बनाउने प्रवृत्तिले दलहरूको विश्वसनीयता कमजोर बनाएको उनको भनाइ थियो ।
थापाले काँग्रेस सत्ता केन्द्रित राजनीतिभन्दा जनादेश, लोकतान्त्रिक मूल्य र पार्टीका आधारभूत सिद्धान्तलाई प्राथमिकता दिएर अघि बढ्ने बताए ।
