काठमाडौँ । प्रतिपक्षी दल नेकपा (एमाले) ले संसदीय गतिविधिलाई थप तथ्यपरक, बौद्धिक र प्रभावकारी बनाउन विभिन्न क्षेत्रका विज्ञहरूको ‘रोस्टर’ र ‘क्लस्टर’ निर्माण गर्ने भएको छ ।
पार्टी केन्द्रीय कार्यालय च्यासलमा आयोजित कार्यक्रममा एमाले संसदीय दलकी उपनेता पद्मा अर्यालले सांसदहरूको प्रस्तुति केवल राजनीतिक नभई अध्ययन, अनुसन्धान र तथ्यमा आधारित हुनुपर्ने बताइन् । उनका अनुसार विज्ञहरूको रुचि र विशेषज्ञताका आधारमा ‘रोस्टर’ तयार गरी विषयगत ‘क्लस्टर’ गठन गरिनेछ ।
अर्यालले संसद्मा उठाइने विषयलाई थप प्रभावकारी बनाउन ‘इस्यु कलेक्सन सेन्टर’ पनि स्थापना गरिने जानकारी दिइन् । उक्त केन्द्रले जनसरोकारका मुद्दा, सामाजिक विषय तथा राष्ट्रिय–अन्तर्राष्ट्रिय घटनाक्रमको अध्ययन गरी तथ्य संकलन गर्नेछ, जसले सांसदहरूलाई सदनमा प्रभावकारी बहस गर्न सहयोग पुग्ने अपेक्षा गरिएको छ ।
उनले राजनीतिक अनुभव र विज्ञहरूको ज्ञान तथा अनुसन्धानलाई संयोजन गरेर पार्टीलाई आवश्यक नीति तथा मार्गदर्शन प्रदान गर्ने विश्वास व्यक्त गर्दै जनताको आवाज सरकारसम्म पुर्याउन र सरकारका गतिविधिमाथि प्रभावकारी खबरदारी गर्न एमालेको भूमिका अझ सशक्त बन्नुपर्ने बताइन् ।
