काठमाडौँ । नेपाली काँग्रेसका पूर्वसभापति शेरबहादुर देउवानिकट नेताहरूको बैठक अहिले काठमाडौँमा जारी छ। चुनदेवीस्थित सम्पर्क कार्यालयमा भइरहेको बैठकमा पार्टीको वर्तमान अवस्था, आन्तरिक संगठन तथा आगामी राजनीतिक रणनीतिका विषयमा छलफल भइरहेको जनाइएको छ।
बैठक पूर्वउपसभापति पूर्णबहादुर खड्काको पहलमा आयोजना गरिएको हो। नेता मीन विश्वकर्माका अनुसार काठमाडौंमा उपलब्ध पार्टीका पूर्वपदाधिकारी तथा वरिष्ठ नेताहरू बैठकमा सहभागी छन्।
छलफलमा पार्टीभित्र देखिएका आन्तरिक मतभेद, संगठन सुदृढीकरणका उपाय तथा समसामयिक राजनीतिक घटनाक्रमबारे विचार–विमर्श भइरहेको स्रोतले जनाएको छ।
यता, संस्थापन पक्षका गतिविधिलाई सन्तुलन गर्ने उद्देश्यसहित देउवा पक्षले आगामी साउन ६ गते बिपी स्मृति दिवसका अवसरमा छुट्टै कार्यक्रम आयोजना गर्ने तयारी गरेको छ। उक्त कार्यक्रमको तयारी र त्यससँग सम्बन्धित रणनीतिबारे पनि बैठकमा छलफल भएको बताइएको छ।
