काठमाडौं । नेपाली कम्युनिष्ट पार्टी (नेकपा)का प्रमुख सचेतक युवराज दुलालले त्रिपुरेश्वरस्थित राहदानी विभागअघि एक सेवाग्राहीले गरेको आत्मदाह प्रयासप्रति सरकारको ध्यानाकर्षण गराएका छन् ।
प्रतिनिधिसभाको बिहीबारको बैठकमा बोल्दै दुलालले राहदानी प्राप्त गर्न भएको ढिलाइका कारण आजित भएका एक अज्ञात पुरुषले आफ्नो शरीरमा पेट्रोलियम पदार्थ खन्याएर आत्मदाहको प्रयास गरेको प्रारम्भिक जानकारी आएको बताए ।
घटनालाई लिएर उनले सरकारको सेवा प्रवाह र जिम्मेवारीमाथि प्रश्न उठाए। जनताको घरदैलोमै राहदानी सेवा पुर्याउने उद्घोष गरेको सरकारले सेवा प्रवाह प्रभावकारी बनाउन नसक्दा सेवाग्राही आत्मघाती कदम चाल्न बाध्य भएको उनको भनाइ थियो ।
“त्रिपुरेश्वरस्थित राहदानी विभागअघि एक पीडित सेवाग्राहीले आफ्नो शरीरमा आगो लगाइरहँदा सरकार कहाँ छ ? कति नागरिकले आत्मदाह गरेपछि मात्र राहदानी घरघरमा पुग्ने हो ?” उनले भने ।
दुलालले घटनाप्रति दुःख व्यक्त गर्दै नागरिकका समस्याप्रति संवेदनशील भएर सेवा प्रवाह सुधार्न सरकारसँग आग्रह गरे।
