काठमाडौँ । ‘मोडल हन्ट नेपाल २०२३’ को उपाधि रोनिश खड्गी र आयुष्मा पौडेलले जितेका छन् ।
काठमाडौँमा खड्गीले १५ प्रतियोगीलाई पछि पार्दै पुरुषतर्फ तथा पर्वतकी पौडेलले २१ प्रतियोगीलाई पछि पार्दै महिलातर्फको उपाधि चुमेका हुन् ।
शुक्रवार साँझ होटेल सोल्टीमा आयोजित फाइनलमा पुरुषतर्फ लक्की राणापहेली फस्ट रनरअप र शौनाक मल्ल सेकेन्ड रनरअप बन्दा महिलातर्फ रिया मेहता फस्ट रनरअप र मोनिका बुढाथोकी सेकेन्ड रनरअप घोषित भए ।
नेपाली मोडलिङ प्रतियोगितामा बृहत् र स्तरीय मानिएको प्रतियोगितामा मोस्ट पपुलर छिरिङ फुंस्टोक गुरुङ र मोनिका बुढाथोकी, फोटो जेनिक रिया मेहता र सोहज खान, कमर्सियल मोडल लक्की राणापहेली र क्रिस्टिना ढुङ्गाना, पब्लिक च्वाइस रोनिश खड्गी र सहारा केसी, बेष्टवाक आवाज कार्की र सुजल बम, मोस्ट स्टाइलिस लिसा बर्नवाल, आंसुतोष थापा, वेस्ट पर्सनालिटी सुनिल अधिकारी र अनिसा मैनाली, फिटनेस मोडल रोनिश खड्गी, वेस्ट फिगर मेधना श्रेष्ठ भए ।
प्रतियोगितामा स्पेसल रिकगननेसन अवार्ड सुजल बम र सोनिया तामाङ (भिन्न क्षमताको सहभागी)ले प्राप्त गरे ।
प्रतियोगिताको यो आठौँ संस्करण हो । प्रशान्त ताम्राकार (अभिनेता, कोरियोग्राफर), राजभाई सुवाल (फोटोग्राफर) नम्रता श्रेष्ठ (मिस नेपाल २०२०), सोफिया भुजेल (मिस युनिभर्स २०२२), समर्पण कार्की (मिस्टर नेपाल २०२३) र मदन रौनियार (प्रबन्ध निर्देशक जोय पपाय) यो संस्करणको निर्णायकमा रहेका थिए ।
दक्ष तथा अनुभवी विभिन्न प्रशिक्षकबाट व्यक्तित्व विकास, शारीरिक बनावट, र्याम्प वाक, बडी ल्याङ्ग्वेज, फोटोसुट, एक्सप्रेसन, ग्रुमिङ क्लास लगायत प्रशिक्षण सहित प्रतियोगिता फाइनल प्रतिस्पर्धामा उत्रिएका थिए ।
स्वदेश तथा विदेशका विभिन्न प्लेटफर्ममा सजिलै अवसर पाउन सक्ने व्यावसायिक मोडल उत्पादन गर्ने उद्देश्यले विगत ८ वर्षदेखि नियमित आयोजना हुँदै आएको प्रतियोगिताका विजेता मध्ये रोनिशले पार्टो रिको देशमा आयोजना हुने अन्तर्राष्ट्रिय मोडलिङ प्रतियोगिता ‘रनवे मोडल इन्टरनेशनल’मा नेपालको प्रतिनिधित्व गर्ने र आयुष्माले थाइल्यान्डमा आयोजना हुने मोडलिङ प्रतियोगिता ‘सुपर मोडल इन्टरनेसनलमा’ नेपालको प्रतिनिधित्व गर्नेछन् ।
दुवै विजेताले विज्ञापन, म्युजिक भिडियो अभिनय अवसरका अलवा राष्ट्रिय तथा अन्तर्राष्ट्रिय फेसन शोमा पनि सहभागीको अवसर प्राप्त गरेको आयोजक नेक्स्ट मोडल्सकी कार्यकारी निर्देशक यतना पाण्डेले जानकारी दिइन् ।
फेसनमय वातावरणमा विभिन्न साङ्गीतिक तामझाम सहित आयोजित प्रतियोगिताको क्रेज युवायुवतीमा बढ्दो रहेकोले आगामी वर्षमा पनि यो प्रतियोगिताले निरन्तरता पाउने आयोजक नेक्स्ट मोडल्स नेपालका अध्यक्ष रवि धमलाले बताए ।