रामेछाप । घरमा बास मागेर एक रातको लागि बसेका व्यक्तिले गहना चोरेर भागेका छन् ।
जिल्लाको मन्थली नगरपालिका-८ चिसापानीमा श्याम सुन्दर श्रेष्ठको घरमा बास बस्न पुगेका व्यक्ति गहना चोरेर फरार भएका हुन् ।
सावुन, मन्जन, स्याम्पु लगायतका समाग्री बेच्दै हिड्ने क्रममा रात परेपछि दार्चुलाको मार्मा गाउँपालिका-४ तपोवन घर बताउने वर्ष १९ को लोकेन्द्र महराले सोमबार साँझ श्रेष्ठको घरमा बास मागेका थिए ।
बास बसेका महरा भोलीपल्ट बिहानै सुनको तिलहरी सहितका गरहगना चोरेर फरार भएपछि श्रेष्ठले प्रहरीमा खबर गरेका हुन् ।
फरार रहेका महराको खोतजलास गर्ने क्रममा मन्थलीको धोबी होटलमा लुकीछिपी बसेको अवस्थामा प्रहरीले नियन्त्रणमा लिएको जिल्ला प्रहरी कार्यालय रामेछापका सूचना अधिकारी प्रहरी निरीक्षक (इन्स्पेक्टर) शैलेन्द्र कुमार खड्काले केटिएम दैनिकलाई बताए ।
उनको साथबाट सुन जस्तो देखिने पहेलो धातु टुक्राटुक्रा पारी कागजमा बेरेर लुकाई छिपाई राखेको अवस्थामा बरामद भएको इन्स्पेक्टर खड्काले जानकारी दिए ।
महराउपर आवश्यक कानूनी कारवाहीको लागि रामेछाप जिल्ला अदालतवाट म्याद थप भई अनुसन्धान भइरहेको रामेछाप प्रहरीले जारी गरेको प्रेस विज्ञप्तीमा उल्लेख छ ।