हेटौँडा । भारतबाट नेपाल घुम्न आएका १३ तीर्थयात्री मकवानपुरमा दुर्घटनामा परी घाइते भएका छन् ।
आज आहान ३:३५ बजे इन्द्रसरोवर गाउँपालिका-५ मकैबारीस्थित कुलेखानी-मातातीर्थ काठमाडौं जाने भित्री सडकखण्डमा मधेस प्र.०३-००१ज०२८३ नम्बरको सुमो दुर्घटनामा परेको थियो ।
वीरगञ्जबाट काठमाडौंतर्फ जाँदै गरेको उक्त सुमो आफैँ अनियन्त्रित भई दुर्घटना भएको मकवानपुरका प्रहरी नायब उपरीक्षक लक्ष्मी भण्डारीले बताए ।
सुमो सडकबाट अन्दाजी २० मिटर तल खोल्सामा खसेको र सुमो चालक बारा जिल्लाको कलैया नगरपालिका-२१ बस्ने वर्ष २५ को अनिलकुमार शाह प्रहरीको नियन्त्रणमा रहेको उनले जानकारी दिए ।
सुमोमा सवार घाइतेमध्ये आठजना महिला रहेका छन् उनीहरूलाई उपचारका लागि काठमाडौँ पठाइएको प्रहरी नायब उपरीक्षक भण्डारीले बताए।
घाइते हुनेमा भारतको छत्तिसगढको जानकी चापा निवासी २५ वर्षीया रचना कुमारी सुर्यबंशी, ३५ वर्षीया गंगा देवि सुर्यबंशी, ३० वर्षीया मधु सुर्यबंशी, ३७ वर्षीय ईन्द्र सेन, ३१ वर्षीया रितु सुर्यबंशी, २९ वर्षीया सरोजनी देवी, ११ वर्षीया प्रतिभा सुर्यबंशी, २ वर्षकी दिब्या सुर्यबंशी, ४ वर्षका प्रतिक सुर्यबशी, ३१ वर्षीय विजय कुमार सुर्यबंशी, ३५ वर्षका अजय कुमार सुर्यबंशी र नाम नखुलेकी एक महिला रहेकी छन् ।
