सिन्धुली । सिन्धुलीको दुधौली नगरपालिका-८ तिकुनेमा एम्बुलेन्स र अटो ठक्कर खाँदा छ जना घाइते भएका छन् ।
आज दिउँसो ३:०० बजे मदन भण्डारी राजमार्गमा दुधौलीबाट कटारी तर्फ जाँदै गरेको स १ ह ३३७७ नम्बरको अटोलाई कटारी बाट दुधौली तर्फ आउँदै गरेको प्रदेश ३-०१-०२३ च ४७१५ नं. को एम्बुलेन्सले ठक्कर दिएको थियो ।
उक्त दुर्घटनामा अटोमा सवार चालक सहित ६ जना घाइते भएका छन् । घाइतेमध्ये पाँच जनालाई थप उपचारको लागि धुलिखेल तर्फ पठाइएको र एक जनाको स्थानीय हेम्स हस्पिटलमा उपचार भई रहेको जिल्ला प्रहरी प्रमुख राजकुमार सिलवालले बताए ।
घाइतेहरूमा अटो चालक दुधौली नगरपालिका- ७ बस्ने वर्ष ४२ को अर्जुन के. सी. सोही स्थानका वर्ष २८ को निरज खत्री, वर्ष २८ कि समीक्षा अधिकारी, वर्ष ४५ की कल्पना खत्री, वर्ष ३६ की विनीता श्रेष्ठ रहेका छन् । उनीहरूलाई उपचारको लागि काभ्रेको धुलिखेल अस्पताल पठाइएको प्रहरी उपरीक्षक सिलवालले बताए ।
त्यस्तै अर्का घाइते वर्ष ४५ को बल बहादुर थापा मगरको स्थानीय हिम्स हस्पिटलमा उपचार भई रहेको छ ।
दुर्घटनामा संलग्न एम्बुलेन्स र त्यसका चालक प्रहरी नियन्त्रणमा रहेका छन् ।
