काभ्रेपलाञ्चोक । काभ्रेपलाञ्चोकको धुलिखेलका होटलमा स्वास्थ्यसम्बन्धी अभिमुखीकरण कार्यक्रम गरिने भएको छ ।
जिल्लास्थित कोभिड-१९ अनुगमन समिति तथा महामारी नियन्त्रण, व्यवस्थापन एवं रोकथाम समितिले पछिल्लो सातादेखि काभ्रेपलाञ्चोकमा कोरोना, डेङ्गु, रेबिज, झाडापखालालगायत रोग नियन्त्रणका लागि धुलिखेलका होटल व्यवसायीसँग छलफल गरी अभिमुखीकरण कार्यक्रम गर्ने योजना बनाएको हो ।
यसका लागि यहाँका होटल क्षेत्रलाई स्वास्थ्य सङ्कटमुक्त बनाउन आवश्यक ठानिएको जिल्ला स्वास्थ्य कार्यालयका प्रमुख डा पुरुषोत्तम सेढाईंले बताए। सो अभियानअन्तर्गत पहिलो चरणमा होटलमा कार्यरत् व्यक्तिलाई स्वास्थ्यसम्बन्धी अभिमुखीकरण गराइने छ ।
“धुलिखेलका होटलले एउटा सुपरभाइजर तोक्नुपर्ने छ । उसले होटलमा आउने पर्यटक तथा पाहुनालाई स्वास्थ्य सङ्कट तथा महामारीबाट जोगिन अपनाउनुपर्ने स्वास्थ्य सुरक्षाका मापदण्डसहित उपायका बारेमा सचेत गराउनेछन्”, सेढाईंले भने। तोकिएका सुपरभाइजरलाई तालिम प्रदान गरिनेछ ।
धुलिखेलमा साना-ठूला गरी ४९ होटल छन् । ती होटलमा हालसम्म रु आठ अर्ब २२ करोड ५३ लाख लगानी भएको बताइएको छ । काडमाडौँबाट झण्डै ३० किलोमिटरको दूरीमा अवस्थित सदरमुकाम धुलिखेलका होटलमा करीब एक हजार जनाले प्रत्यक्ष रोजगारी पाएका छन् ।
धुलिखेलका होटलमा कार्यरत् जनशक्तिका लागि वार्षिक रु १८ करोड ४५ लाख खर्च हुने गरेको क्षेत्रीय होटल व्यवसायी सङ्घ (हान)ले जनाएको छ ।
प्रमुख जिल्ला अधिकारी पुण्यविक्रम पौडेलले जिल्लाका सबै क्षेत्र स्वास्थ्यका हिसाबले सुरक्षित छन् भन्ने सन्देश दिन जिल्ला र स्थानीय तहस्तरमा पनि कोभिड अनुगमन समिति तथा महामारी नियन्त्रण, व्यवस्थापन एवं रोकथाम समिति गठन गरिएको बताए ।
क्षेत्रीय होटल व्यवसायी सङ्घका अध्यक्ष प्रेमकृष्ण श्रेष्ठ हरेक होटलले स्वास्थ्य मापदण्ड पूरा गर्न सुपरभाइजर तथा स्वास्थ्यकर्मी राख्ने बताउँछन्।
काभ्रेपलाञ्चोकमा कोभिड-१९ बाट हालसम्म १८ हजार एक सय ९६ जना सङ्क्रमित भएकामा एक सय ९६ जनाले ज्यान गुमाएको तथ्याङ्क छ । पछिल्लो समय कोरोनाबाट ३३ जना सङ्क्रमित छन् ।