काठमाडौं । एक तिब्बेतियन शरणार्थी महिला नेपाली नागरिकतासहित पक्राउ परेकी छन् ।
तिब्बतबाट भारतको बिहार दिल्ली हुदै बिगत २ बर्ष देखि बौद्धको बुद्ध तुशाल क्याम्पमा बसोबास गर्ने गरेकी एक तिब्बेतियन शरणार्थी महिलाले नेपाली नागरिकता लिएको खुलेको हो ।
काठमाडौँको बिभिन्न ठाँउमा बसोबास गर्ने तिब्बेतियन शरणार्थीले सरकारी कार्यालयहरुको कागजात, छाप तथा कर्मचारीको दस्तखत समेत किर्ते गरी नक्कली बुबा समेत खडा गरी नागरिकता लिएको विषयमा अनुसन्धान गर्दा प्रहरीले उनलाई पक्राउ गरेको हो ।
जिल्ला प्रशासन कार्यालय काठमाडौँबाट निमा ल्हामो गुरुङको नाममा जारी भएको नागरिकता सहित उनलाई बौद्धबाट पक्राउ गरि नागरिकता ऐन तथा लिखत सम्बन्धि कसुरमा आवाश्यक कारबाहीका लागि जिल्ला प्रहरी परिसर टेकु पठाइएको काठमाडौं उपत्यका अपराध अनुसन्धान कार्यालय मिनभवनले जनाएको छ ।
अनुसन्धानको क्रममा ती महिलाले क्याम्पमा बसोबास गर्ने ब्यक्ति मार्फतबाट नेपाली नागरिक कृष्ण बहादुर कटुवाललाई नागरिकता बनाउनको लागि सम्पर्क गरेको खुलेको छ ।
कटुवालले रु पाँच लाख रुपैयाँ लिएर निमा ल्हामो गुरुङको नेपाली नागरिकता बनाई दिएको समेत अनुसन्धानमा देखिएको प्रहरी उपरीक्षक रविन्द्र रेग्मीले बताए ।
केही समयअगाडि नेपाली नागरिकता र पासपोर्ट भएकी चिनियाँ महिला दिल्लीबाट पक्राउ परेकी थिइन् ।