काठमाडौं । काठमाडौंको ग्राण्डी अस्पताल नजिक रहेको एक गेष्ट हाउसमा नाबालिकालाई सामूहिक जबरजस्ती करणी गर्ने दुई युवालाई प्रहरीले पक्राउ गरेको छ ।
यसरी पक्राउ पर्नेमा सिन्धुपाल्चोक मेलम्ची नगरपालिका-३ घर भई हाल धापासी बस्ने वर्ष २१ को आषिस तामाङ भन्ने निमा तामाङ र काभ्रेपलाञ्चोक महाभारत गाउँपालिका-७ घर भई धापासी बस्ने वर्ष २१ को कुशल श्रेष्ठ रहेको प्रहरीले जनाएको छ ।
दुईजनालाई एक नाबालिकालाई फाल्गुन ६ गते गेष्ट हाउसमा जबरजस्ती करणी गरेर फरार भएका थिए । उनीहरूलाई काठमाडौं उपत्यका अपराध अनुसन्धान कार्यालय मिनभवन, काठमाडौंबाट खटिएको प्रहरीले टोलीले सोमबार पक्राउ गरेको हो ।
पक्राउ परेका तामाङले फेसबुकमार्फत नक्कली खाता खोलेर ती नाबालिकासँग परिचय गरेको अनुसन्धानको क्रममा खुलेको छ । उनले ती नाबालिकालाई साथी बनाई भेटघाट गर्ने भन्दै गेष्ट हाउसमा बोलाएको र त्यहीँ कुशल श्रेष्ठलाई पनि बोलाएर सामूहिक करणी गरेको खुलेको छ ।
नेपालको कानुनले १८ वर्ष भन्दा कम उमेरका बालिकाहरूसँग उनीहरूकै सहमतिमा शारीरिक सम्वन्ध राखेतापनि उक्त सम्वन्धलाई बलात्कार ठहर गर्दछ ।
पक्राउ परेका दुवैलाई थप अनुसन्धानकआ लागि तथा कारवाहीको लागि प्रहरी वृत्त महाराजगंज पठाईएको अपराध अनुसन्धान कार्यालयका प्रवक्ता प्रहरी उपरीक्षक रविन्द्र रेग्मीले बताए ।
