भक्तपुर । शुक्रबार (हिजो) राती भक्तपुरमा टिपरको ठक्करबाट स्कुटर चालकको निधन भएको छ ।
हिजो राती १०:४६ बजे सानोठिमीमा रहेको जनक शिक्षा सामाग्री केन्द्र अगाडि बहाखा बजारबाट सानोठिमी तर्फ जाँदै गरेको बा.४ख. २३४७ नम्बरको ट्रिफर र बिपरीत दिशाबाट आँउदै गरेको बा.९२प. ५५३१ नम्बरको स्कुटर एक आपसमा ठक्कर खाएर दुर्घटना भएको हो ।
उक्त दुर्घटनामा स्कुटर चालक काभ्रेपलान्चोक रोशी गाँउपालिका-१० घर भई गठ्ठाघर, भक्तपुर बस्ने बर्ष २३ को बिशाल मैनाली गम्भिर घाईते भएका थिए ।
घाइते मैनालीलाई उपचारको लागि नागरिक कम्युनिटी अस्पताल गठ्ठाघर, लगेकोमा उपचारको क्रममा राती ११:२१ बजेको समयमा चिकित्सकले मृत घोषित गरेका हुन् ।
घटनास्थलमा प्रहरी वृत्त ठिमी भक्तपुरबाट अनुसन्धान अधिकृत सहितको प्रहरी टोली खटिई गई प्रारम्भिक अनुसन्धान कार्य भइरहेको जिल्ला प्रहरी परिसर भक्तपुरका प्रहरी निरीक्षक किशोर ढुंगानाले जानकारी दिए ।
दुर्घटनामा संलग्न टिपर र टिपर चालक धादिङ थाक्रे गाँउपालिका-७ घर भई हाल भक्तपुर सिपाडोल बस्ने बर्ष ४२ को सुरेश तामाङलाई प्रहरी वृत्त ठिमीले नियन्त्रणमा लिएको छ ।
मध्यबानेश्वरमा मोटरसाइकलको ठक्करबाट पैदलयात्रुको निधन
काठमाडौं महानगरपालिका-१० कृष्णभोग पार्टीप्यालेस मोटरसाइकलको ठक्करबाट घाइते भएका पैदलयात्रीको निधन भएको छ ।
बा.प्र.०२-०४० प ८९९० नम्बरको मोटरसाइकलको ठक्करबाट घाइते पैदलयात्री बानेश्वर थापागाउँ घर भएकी ६० वर्षीया सुनिता कुमारी पौड्यालको शुक्रबार साँझ मृत्यु भएको हो ।
ठक्करबाट गम्भीर घाइते भएकी उनको राष्ट्रिय ट्रमा सेन्टरमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।