सिन्धुली । आज बिहान ८:३० बजे बोलेरोबाट लडेर घाइते भएका यात्रुलाई थप उपचारको लागि हेलिकप्टरबाट काठमाडौँ ल्याइएको छ ।
दुधौली नगरपालिका-१३ कामीटार स्थित भित्री सडक-खण्डमा जिनाखुबाट दुधौलीतर्फ आउँदै गरेको स १ च १७४९ नम्बरको पिक अप बोलेरोमा पछाडि सवार व्यक्ति अचानक लडेका थिए ।
यसरी लड्नेमा दुधौली नगरपालिका-१२ जिनाखु बस्ने वर्ष अन्दाजी ३५ को नेत्र पौडेल रहेको जिल्ला प्रहरी कार्यालय सिन्धुलीका प्रवक्ता प्रहरी नायब उपरीक्षक चिरञ्जीवी दाहालले केटिएम दैनिकलाई बताए ।
टाउको र अनुहारमा चोट लागेको अवस्था गम्भीर देखिएका पौडेलको सिन्धुली जिल्ला अस्पतालमा उपचार सम्भव नभएपछि थप उपचारको लागि हेलिकप्टरबाट काठमाडौँ ल्याइएको हो ।
उनलाई आज दिउँसो १:२५ बजे मनाङ एयरको हेलिकप्टरबाट काठमाडौँ ल्याइएको प्रवक्ता गिरीले बताए । पौडेलको काठमाडौँको मेडिसिटि अस्पतालमा उपचार भइरहेको छ ।
उनी चढेको बोलेरो पिक अप गाडी र सो गाडीका चालक प्रहरीको नियन्त्रणमा रहेको बताइएको छ ।
