काठमाडौँ । ११ वर्षअघि चोरी गरेर अहिलेसम्म फरार भएका एक व्यक्ति पक्राउ परेका छन् ।
२०६८ साल असार २ गते बिहान भक्तपुरको लोकन्थलीमा रुद्र कुमार कार्कीलाई बाटो छेकेर छुरी देखाउँदै उनीसँग रहेको नगद रु पाँच हजार ५०० चोरी गरिएको थियो ।
उक्त कार्यमा सिन्धुपाल्चोकको चौतारा साँगाचोकगढी नगरपालिका-२ बस्ने सुकदेव नेपालसहित चार जना संलग्न भएको देखिएपछि प्रहरीले सबैलाई पक्राउ गरेर जिल्ला अदालतमा मुद्दा चलाएको थियो ।
२०६८ साल भाद्र १३ गते भक्तपुर जिल्ला अदालतका न्यायाधीश रामप्रसाद ओलीले उनीहरूलाई एक महिना पन्ध्र दिन कैद र चोरी गरेको रकमको डेढी रकम (रु आठ हजार दुई सय पचास) जरिवाना तोकेको थियो ।
प्रहरी हिरासतमा रहेको १९ दिन कटाएर बाँकी रहेको २६ दिन जेलमा बस्नुपर्ने भक्तपुरको जिल्ला अदालतले फैसला गरेको थियो ।
तर, जिल्ला अदालतको फैसलामा चित्त नबुझेपछि कार्की उच्च अदालत गए । उच्च अदालत पाटनको फैसला आउने समयसम्म नेपालसहित चारजना जिल्ला अदालतले निर्धारण गरेको सजाय काटेर जेलमुक्त भइसकेका थिए ।
२०६९ माघ २ गते उच्च अदालत पाटनका न्यायाधीशद्वय प्रकाशराम मिश्र र टिका बहादुर हमालले जिल्लाको फैसला केही उल्टाएर एघार महिना २६ दिन कैद सजाय तोकिदिए ।
उच्च अदालतको फैसालपछि फरार रहेका नेपाल अहिले पक्राउ परेका हुन् ।
उनलाई भक्तपुरको बालकोटबाट फाल्गुन ३० गते पक्राउ गरिएको जिल्ला प्रहरी कार्यालय सिन्धुपाल्चोकका प्रवक्ता डिएसपी राम कुमार यादवले केटिएम दैनिकलाई बताए ।
उनलाई आज सिन्धुपाल्चोक जिल्ला अदालतमा पेश गरेकोमा कैद असुलका लागि कारागार चलान गरिएको यादवले बताए ।