काठमाडौं । १७ वर्षीया नाबालिकालाई होटलमा लगेर जबरजस्ती करणी गरेको अभियोगमा प्रहरीले काठमाडौंबाट एक युवकलाई पक्राउ गरेको छ ।
पक्राउ पर्नेमा धादिङको गंगाजमुना गाउँपालिका-९ घर भई काठमाडौं नागार्जुन नगरपालिका-४ सितापाईला बस्ने ३४ वर्षीय सुरज अधिकारी रहेका छन् ।
अधिकारीलाई मंगलबार बिहान प्रहरीले पक्राउ गरेको प्रहरी परिसर काठमाडौंले जनाएको छ ।
अधिकारीले ती किशोरीलाई काठमाडौं महानगरपालिका-१५ कारखाना चोकस्थित होटलमा जबरजस्ती करणी गरेको भन्ने उजुरीको आधारमा प्रहरी वृत्त स्वयम्भूबाट खटिएको प्रहरीले उनलाई पक्राउ गरेको हो ।
यस्तै पर्सामा १७ वर्षीया किशोरीलाई जबरजस्ती करणी गरेको अभियोगमा ठोरी गाउँपालिका-१ दिपकनगर बस्ने ५९ वर्षीय रामचन्द्र क्षेत्रीलाई सोमबार साँझ प्रहरीले पक्राउ गरेको छ ।
क्षेत्रीले ती किशोरीलाई सोही ठाउँस्थित सिंङगे खोलाको बगरमा जबरजस्ती करणी गरेको भन्ने उजुरीको आधारमा ईलाका प्रहरी कार्यालय ठोरीबाट खटिएको प्रहरीले उनलाई पक्राउ गरेको हो ।
नेपालको कानुनले १८ वर्ष वा सो भन्दा कम उमेरका बालिकाहरूलाई उनीहरूकै मञ्जुरीमा शारीरिक सम्बन्ध राखेतापनि उक्त सम्बन्धलाई बलात्कार ठहर गर्दछ ।