नेपाली सेनाले आफ्ना संस्थापक पृथ्वीनारायण शाहको ३०१ औँ जन्मजयन्तीका अवसरमा बुधबार (आज) मुलुकभर विभिन्न कार्यक्रम गरी मनाएको छ । सोही क्रममा गोरखा दरबारको ठूलो आँगनमा राष्ट्रनिर्माताको पूर्णकदको शालिकको प्रधानसेनापति प्रभुराम शर्माले अनावरण गरेको नेपाली सेनाका प्रवक्ता कृष्णप्रसाद भण्डारीले जानकारी दिए।
गोरखा नगरपालिका र सेनाको स्थानीय पल्टनको सहकार्यमा उक्त कार्यक्रम सम्पन्न भएको हो । सेनाले आज बिहानैबाट त्यहाँ हरेक दिन बिहान र बेलुका राष्ट्रनिर्माताको सम्मान विगुल बजाएर सलामी दिने कार्यको शुभारम्भ गरेको छ ।
हिजो (मंगलबार) नेपाली सेनाको नारायणीहिटीमा रहेको उपत्यका पृतना हेडक्वाटरमा पृथ्वीनारायण शाहको पूर्णकदको शालिक अनावरण गरेको थियो ।
पृथ्वी जयन्ती मनाउने यसै सिलसिलामा पौष २१ गतेबाट पौष २७ गतेसम्म नेपाली सेनाले गोरखादेखि काठमाडौंसम्म एकीकरण मार्ग पदयात्रा संचालन भएको थियो । नेपालको एकीकरण अभियानको थालनी गर्ने बेला स्थापना भएका पाँचवटा पल्टनको प्रतिनिधित्व हुने गरी संचालन भएको पदयात्रा गोरखाबाट धादिङ्ग, नुवाकोट, काठमाण्डौं हनुमानढोका हुदै जंगी अड्डा पुगेर समापन भएको नेपाली सेनाको जनसम्पर्क तथा सूचना निर्देशनालयले जनाएको छ ।
उक्त पदयात्रा टोली काठमाण्डौं पृथ्वीनारायण शाहको फोटो बग्गीमा राखी नगर परिक्रममा गरिएको थियो ।
यसैबीच, राष्ट्रिय प्रजातन्त्र पार्टी गोरखाले गोरखा नगरपालिकाको नाम परिवर्तन गरेर ‘पृथ्वीनारायण नगरपालिका’ राख्न माग गरेको छ । नगरप्रमुख कृष्णबहादुर रानामगरलाई ज्ञापनपत्र बुझाउँदै राप्रपा गोरखाले नाम परिवर्तन गर्न माग गरेको हो ।