नेपाली कांग्रेसका महामन्त्री गगनकुमार थापाले निर्वाचनपछि कांग्रेसकै नेतृत्वमा सरकार बन्ने बताएका छन् । थापाले प्रतिनिधि प्रदेश सभाको निर्वाचनपश्चात कांग्रेसको नेतृत्वमा सरकार बन्नेमा कुनै अलमल नभएको दाबी गरे ।
प्रशासन, व्यवस्थापन र विकास केन्द्र (कामाद)को २० औं साधारण सभामा बोल्दै थापाले गठबन्धनका दलहरुबीच सिट बाडँफाँड टुंगो अन्तिम चरणमा पुगेको बताए । उनले आफुहरुको सम्पूर्ण ध्यान उम्मेद्वारी चयनमा रहेको बताउँदै छिट्टै नै उम्मेद्वार तय गरेर चुनावी अभियान जाने जिकिर गरे ।
उनले भने, “हामीहरु केही दिनमा उम्मेद्वारी चयन गरेर जुट्छौं । अहिले त गठबन्धन भएकोले को–कहाँ लड्ने तालमेल मिलाउँदैछौं । अहिले सम्पूर्ण ध्यान त्यसमा छ । केही दिनपछि हाम्रो ध्यान उम्मेद्वारी चयनमा हुन्छ । त्यसपछि हाम्रो चुनावी अभियानमा हुन्छ । यो पटक निर्वाचन पनि जित्छौं हामि, हाम्रै नेतृत्वमा सरकार बन्छ, त्यसमा कुनै अलमल भएन् ।”
उनले कांग्रेसबाट निर्वाचित स्थानीय तहलाई सक्षम बनाउन ‘स्थानीय सरकार सवलीकरण तथा अनुगमन ईकाइ’ गठन गर्ने तयारी गरेको जानकारी दिए । उनले स्थानीय तहका जनप्रतिनिधिहरुलाई निरन्तर र सशक्त बनाउन महत्वपूर्ण भूमीका विश्वास व्यक्त गरे ।
थापाले थपे, “स्थानीय सरकारको यसपटक हामि के गर्ने कोशिसमा छौं भने स्थानीय तहमा निर्वाचित भएर साथिहरु आउनु भयो । पार्टीमा हामी एउटा डेलिकेटेड र पममेन्ट खालको एउटा ईकाई बनाउन खोज्दै छौं । जसलाई हामी ‘स्थानीय सरकार सवलीकरण तथा अनुगमन ईकाइ’ भनेर पार्टीभित्र राख्न खोज्दैछौं । जसले ५ वर्ष स्थानीय सरकारलाई निरन्तररुपमा उहाँहरुलाई सक्षम र शक्ति दिने हो ।”
निर्वाचनपश्चात कांग्रेस नेतृत्वको सरकार बनेपछि प्रशासनको व्यवस्था, सञ्चालन, कर्मचारीतन्त्रलाई प्रभावकारी बनाउन कामादले महत्वपूर्ण भुमीका खेल्नेमा थापाको जोड छ ।।