नेपाल राष्ट्र बैंकका गभर्नर महाप्रसाद अधिकारीले आयात बराबरको विदेशी मुद्रा ल्याउन नसके नेपाल पनि श्रीलंकाकै अवस्थामा पुग्न सक्ने बताएका छन् ।
बुधबार काठमाडौंमा आयोजित एक कार्यक्रममा अधिकारीले अत्याधिक आयातका कारण भएको विदेशी मुद्रा सञ्चितिसमेत सिध्याउँदै गएकाले अब आयातबराबरको विदेशी मुद्रा ल्याउन नसके नेपाल पनि श्रीलंकाकै अवस्थामा पुग्ने बताएका हुन् ।
उद्योगी व्यवसायीलगायत सबैले नेपालमा नै उत्पादन बढाएर आयात नभइ निर्यात गरी विदेशी मुद्रा आर्जन गर्ने सोच राखे मात्रै मुलुकको अर्थतन्त्र लयमा आउने अधिकारीले बताए ।
श्रीलंकाले लिट्टेसँग लडार्इं गर्दा पनि नभोगेको अर्थतन्त्रको चुनौती अहिले त्यहाँका जनताले भोगेको भन्दै गनर्भर अधिकारीले नेपालले पनि उत्पादकत्व वृद्धिमा जोड नदिएर आयात मात्रै गरे श्रीलंकाकै अवस्था हुने दाबी गरे ।
नेपालको आन्तरिक र वैदेशिक गरी कुल ऋण करिब १७ खर्ब मात्रै छ । जुन नेपालको कुल ग्राहस्थ उत्पादन (जीडीपी)को करिब ४१ प्रतिशत मात्रै हो । श्रीलंकको कर्जा भने जीडीपीको ११० प्रतिशतभन्दा बढी छ ।
