नेपाल राष्ट्र बैंकका गर्भनर महाप्रसाद अधिकारीको राजिनामा माग गर्दै काठमाडौंको प्रदर्शनीमार्गमा नेकपा (माओवादी केन्द्र) समर्थित विद्यार्थी संगठनले प्रदर्शन गरेको छ ।
एमालेले यही असार २६ गते जारी गरेको ‘अन्तरपार्टी निर्देशन’ मा ‘अर्थ तथा योजना विभाग’ को सदस्यका रूपमा एम अधिकारीको नाम समावेश छ । एम अधिकारीको ठेगाना खोटाङ उल्लेख गरिएको छ ।
यसअगाडि २०७३ सालमा सोही विभागमा महाप्रसाद अधिकारी थिए अहिले एमालेको अर्थ तथा योजना विभागको सदस्य रहेका एम अधिकारी राष्ट्र बैंकका गभर्नर महाप्रसाद अधिकारी नै रहेको भन्दै सामाजिक सञ्जालदेखि सदनसम्म तीव्र आलोचना भइरहेको छ ।
त्यतिबेलै उनले आफू सदस्य नरहेको भनेर पार्टीलाई जानकारी गराएको तथा पार्टीले समेत सोही बेहोराको पत्र पठाएको भनी अहिले पत्रहरू पनि सार्वजनिक भएका छन् ।
कुनै पनि पार्टीको सदस्य रहेको व्यक्ति राष्ट्र बैंकको गभर्नर बन्न अयोग्य हुने कानूनी व्यवस्था छ ।आजै राष्ट्रिय सभामा बोल्दै एमालेका नेता नारायणकाजी श्रेष्ठले यस विषयमा कुरा उठाएका थिए ।
अखिल (क्रान्तिकारी) क्याम्पस जिल्ला समितिको आयोजनामा गरिएको प्रदर्शनमा सहभागीहरूले एमाले नेता एम.अधिकारीलाई गर्भनर पदबाट बर्खास्त गरियोस् लेखेको ब्यानर बोकेका थिए । उनीहरूले अर्थतन्त्र तहसनहस पार्ने एम. अधिकारी (गर्भनर) राजिनामा दे, पार्टीको कार्यकर्ता गर्भनर बालकोट जा, गर्भनर भएर राजनीति गर्न पाइदैन लगाएका नारा लेखेका प्लेकार्ड बोकेका थिए ।
एमालेको अर्थ विभागका सदस्य ई. देउकाजी गुरुङले महाप्रसाद अधिकारी बैठकमा समेत आउने गरेको भनेर स्वीकारेको ‘अडियो क्लिप’ सामाजिक सञ्जालमा भाइरल भइरहेको छ ।
स्मरण रहोस् अहिले पदबाट राजीनामा दिएका अर्थमन्त्री जर्नादन शर्मा र अधिकारीबीच लामो समयदेखि मनमुटाव थियो । त्यसैको फलस्वरुप सरकारले अधिकारीलाई गर्भनर पदबाट बर्खास्त गरेको भएतापनि सर्वोच्च अदालतको आदेशबाट अधिकारी पुन: राष्ट्र बैंकको गर्भनरमा फिर्ता भएका हुन् ।
गभर्नर एमालेका अर्थ विभाग सदस्य होइनन्: एमाले
वास्तविक यम अधिकारी पत्ता नलागे पनि नेकपा एमालेले राष्टबैँकका गभर्नर महाप्रसाद अधिकारी पार्टीको विभागमा नरहेको दाबी गरेको छ । एमाले पार्टीको अर्थ तथा योजना विभाग सदस्य एम अधिकारी गभर्नर नरहेको स्पस्टीकरण दिएको हो ।
एमाले केन्द्रीय कार्यालयका सचिव भीष्म अधिकारीले अर्थ विभागमा रहेका एम अधिकारी गभर्नर महाप्रसाद अधिकारी नभएको र सरकारी सेवामा रहेकालाई पार्टीको कुनै विभागमा राख्ने नीति समेत नरहेको दाबी गरेका छन् ।
पार्टीको कार्यकर्ता गभर्नर हुन नसक्नै भन्दै सत्ताको नेतृत्व गरिरहेका नेपाली कांग्रेस, नेकपा माओवादी केन्द्र लगायतले अधिकारीको राजीनामा मागिरहेका छन् ।
महाप्रसाद अधिकारीले पनि आफ्नो नाम जोडर प्रचार भइरहेको भन्दै एमाले केन्द्रीय कार्यालयलाई पत्र लेखी आफू कुनै पनि पार्टीको सदस्य रहने कुरा सोच्नसमेत नसकिने बताएका छन् ।
अख्तियारमा उजुरी
नेकपा माओवादी केन्द्रको भ्रातृ संगठन योङ कम्युनिस्ट लिग (वाईसीएल) ले गभर्नर महाप्रसाद अधिकारीविरुद्ध अख्तियारमा उजुरी दर्ता गराएको हो। गभर्नर अधिकारीले आफ्नो शैक्षिक योग्यता ढाँटी राष्ट्रसेवक भई कसुर गरेको आरोप लगाउदै बिहीबार वाइसिएलका नेताहरू काठमाडौंको टंगाल पुगेर उजुरी दिएका हुन्।
उक्त उजुरी सी-०५१४५९ नम्बरमा दर्ता भएको हो । उनीहरूले उजुरीसँगै नेपाल राष्ट्र बैंक ऐन २०५९ को प्रतिलिपि, विभिन्न पत्र पत्रिकामा प्रकाशित समाचारहरूको प्रतिलिपि र नेकपा (एमाले) को केन्द्रीय अर्थ तथा योजना विभागका सदस्य ई. देउकाजी गुरुङले दिएको अडियो अन्तरवार्ताको समाग्री समेत समावेश गरिएको छ ।