नेपाल राष्ट्र बैंकका गर्भनर महाप्रसाद अधिकारीको राजीनामा माग गर्दै तीन विद्यार्थी संगठनले आज काठमाडौंमा विरोध कार्यक्रम गरेका छन् ।
नेपाली कांग्रेस समर्थित नेपाल बिद्यार्थी संघ, माओबादी समर्थित अखिल क्रान्तिकारी र नेकपा (एस) समर्थित अनेरास्ववियुका बिद्यार्थीहरुले आज माइतीघरमा कार्टुन सहित प्रदर्शन गरेका हुन् ।
एमालेले असार २६ गते जारी गरेको ‘अन्तरपार्टी निर्देशन’ मा ‘अर्थ तथा योजना विभाग’ को सदस्यका रूपमा एम अधिकारीको नाम समावेश छ । एम अधिकारीको ठेगाना खोटाङ उल्लेख गरिएको छ ।
यसअगाडि २०७३ सालमा सोही विभागमा महाप्रसाद अधिकारी थिए अहिले एमालेको अर्थ तथा योजना विभागको सदस्य रहेका एम अधिकारी राष्ट्र बैंकका गभर्नर महाप्रसाद अधिकारी नै रहेको भन्दै सामाजिक सञ्जालदेखि सदनसम्म तीव्र आलोचना भइरहेको छ ।
लामो समय वितिसक्दा पनि एमालेले एम अधिकारी गर्भनर नभएको बताएपनि को हुन् एम अधिकारी भन्ने भन्न सकेको छैन । यसैबीचमा बिराटनगरमा बसोबास गर्दै आएका एकजना चार्टड एकाउन्टेन्टलाई एम अधिकारी बनिदिनको लागि एमालेका नेताहरूले आग्रह गरेको समाचार पनि आएका थिए ।
धेरै विरोध भएपछि प्रधानमन्त्री शेर बहादुर देउवाले बालुवाटार बोलाएर अधिकारीलाई राजीनामा दिँदै मार्ग प्रशस्त गरिदिन आग्रह गरेका थिए । अधिकारीले मौद्रिक नीति ल्याएपछि राजीनामा दिने भन्ने खालका समाचार प्रकाशित भएका छन् ।
थप तस्विरहरू