स्थानीय तहको निर्वाचनका लागि देशव्यापी रूपमा भर्ना प्रक्रिया सुरु भएको छ । आइतबारबाट सुरु भएको दर्ता प्रक्रियामा पहिलो दिन रुपन्देहीमा एब हजार ४६५ जनाले र दोस्रो दिन एब हजार ८८७ जनाले दर्ता गरेका छन् ।
चैत ११ गतेसम्म भर्ना प्रक्रिया अगाडि बढाउन आह्वान गरिएको छ ।
जिल्लामा २ हजार ३ सय ६० जना म्यादी प्रहरी भर्ना लिइने भएतापनि दुई दिनमा चाहिने भन्दा लगभग डेढ गुणा आवेदन परिसकेको छ ।
बढेको गर्मीलाई प्रवाह नगरी रुपन्देही मात्र होइन छिमेकी जिल्लाबाट पनि युवाहरू आएर बिहानैदेखि दर्ताका लागि तछाड मछाड गर्दैछन् । जागिरको लालसामा कार्यालयमा बिहानैदेखि आवेदन दिन लाम लागेका युवाहरूको जमात छ । भिडले देशमा बेरोजगारीको अवस्था कस्तो छ भनी प्रस्ट पारेको छ । केही दिन भए पनि जागिर पाइने आसमा युवती र महिलासमेत घण्टौं लाइनमा बस्ने गरेका छन् ।
रुपन्देहीमा २ सय ८ मतदान स्थल तोकिएको छ, आगामी निर्वाचनका लागि ९४ वटा मतदान केन्द्र थपिएसँगै ७ सय ४ वटा मतदान केन्द्र निर्धारण भएको छ । स्थानीय तहको निर्वाचनलाई भयरहित वातावरणमा सम्पन्न गर्न, उच्च सुरक्षा संवेदनशीलता, मतदान केन्द्रको संख्याको आधारमा निर्वाचनको सुरक्षाका लागि ती म्यादी प्रहरी खटाइने भएको हो ।
४० दिन काम गर्न पाउने गरी नेपाल प्रहरी जवान सरहको सेवासुविधा पाइने गरी भर्ना प्रक्रिया अघि बढाइएको हो । कार्यालयबाट ९–१० वटा काउन्टरमा आवेदनको काम भइरहेको छ, कागजपत्र रुजुका लागि डेस्क खडा गरिएको छ । प्रहरी निरीक्षक सहितको टोलीले चेकजाँच गरी दर्ता गर्ने गरेको प्रहरी उपरीक्षक रेग्मीले भने ।
जिल्लाको सुरक्षा चुनौती, निर्वाचन क्षेत्र, मतदान स्थल, मतदान केन्द्रलगायतका स्थिति र अघिल्लो निर्वाचन सुरक्षा रणनीतिलाई आधार बनाएर म्यादी प्रहरीको संख्या निर्धारण गरिएको छ ।
म्यादी प्रहरीले पारिश्रमिक मध्ये ४० दिनको लागि ३० हजार २४० पारिश्रमिक, राशनबापत सात हजार २ सय , पोसाक र अन्य खर्च ६ हजार, यातायात खर्चबापत एक हजार र बिमा सुविधासमेत उपलब्ध गराइने कार्यालयले जानकारी दिएको छ । छनोट प्रक्रिया १५ चैतदेखि, नतिजा प्रकाशन चैत २२ गते गरिने भएको छ । छनोटमा परेका आवेदकलाई चैत २८ बाट प्रशिक्षण दिएर प्रहरीको सहयोगीका रूपमा मतदान स्थल र केन्द्र तथा आवश्यकताअनुसार गस्तीमा खटाइने छ ।
