सरकारले १ लाख जना म्यादी प्रहरी माग गरेको छ ।
आगामी वैशाख ३० गतेका लागि तय भएको स्थानीय तह निर्वाचनका लागि प्रहरी प्रधान कार्यालयले म्यादी प्रहरी भर्ना सम्बन्धी सूचना प्रकाशन गरेको हो ।
जसमा माग पद संख्या १ लाख जना रहेको जनाइएको छ ।
चैत ६ गतेदेखि ११ गतेसम्म दरखास्त दिन सकिने प्रहरी प्रधान कार्यालयले सूचनामा जनाएको छ । तोकिएको मितिभित्र विहान १० बजेदेखि ५ बजेसम्म दरखास्त दिन सकिने छ ।
त्यसका लागि १८ वर्ष पूरा भइ ५४ वर्ष ननाघेको हुनुपर्ने सूचनामा जनाइएको छ। काठमाडौं भक्तपुर र ललितपुर सहित सबै जिल्ला कार्यालयहरूमा इच्छुक नेपाली नागरिकहरूले आवेदन दिन सक्नेछन् ।
आबेदन दिनको लागि कुनै राजनैतिक दलको सदस्य नरहेको शारीरिक तथा मानसिक रुपले तन्दुरुस्त रहेको, साधरण लेखपढ गर्न जान्ने र कुनै नैतिक पतन देखिने फौजदारी अभियोगमा कसुरदार नठहरिएको हुनुपर्नेछ ।
निर्वाचनमा खटिने म्यादी प्रहरीहरूको कार्य अवधि बढीमा ४० दिने हुनेछ भने उनीहरूले मासिक आधारभूत तलब रु २२ हजार ६८० का दरले ४० दिनको ३० हजार २४० रुपैयाँ, खाद्यान्न बापत सात हजार २०० र पोशाक तथा अन्य सामान खरीद गर्ने गरी ६ हजार पाउनेछन् ।
यसरी म्यादी प्रहरीमा छनौट भएकाहरूले प्रतिव्यक्ती रु ४३ हजार ४४० पाउने प्रहरी प्रधान कार्यालय मानवश्रोत एवं प्रशासन विभागले जारी गरेको सूचनामा उल्लेख छ ।
