ललितपुर प्रहरी परिसर जावलाखेलमा आइतबार पहिलो दिन ४ सय ३ जनाले आवेदन दिएका छन् ।
प्रहरी परिसरका प्रहरी निरीक्षक पुस्कर बोगटीका अनुसार ललितपुरमा निर्वाचन प्रयोजनाका लागि १ हजार २ सय ४ जना म्यादी प्रहरीमा आवेदन मागिएकोमा पहिलो दिनमै उत्साहजनक रुपमा युवा युवतीले आवेदन बुझाएका हुन् ।
४० दिनका लागि देशभर १ लाख १९ हजार म्यादी प्रैहरी मागिएको छ ।
आइतबार बिहान १० बजेबाट प्रहरीले फरम वितरण गरेको थियो । दिउँसो १ बजे फारम वितरण बन्द भएको प्रहरी परिसरमा भेटिएका रमेश लिम्बुले बताए ।
ललितपुरमा ६ वटा स्थानीय तहका लागि म्यादी प्रहरी भर्ना गर्न लागिएको हो ।
आबेदन दिनको लागि कुनै राजनैतिक दलको सदस्य नरहेको शारीरिक तथा मानसिक रुपले तन्दुरुस्त रहेको, साधरण लेखपढ गर्न जान्ने र कुनै नैतिक पतन देखिने फौजदारी अभियोगमा कसुरदार नठहरिएको हुनुपर्नेछ ।
निर्वाचनमा खटिने म्यादी प्रहरीहरूको कार्य अवधि बढीमा ४० दिने हुनेछ भने उनीहरूले मासिक आधारभूत तलब रु २२ हजार ६८० का दरले ४० दिनको ३० हजार २४० रुपैयाँ, खाद्यान्न बापत सात हजार २०० र पोशाक तथा अन्य सामान खरीद गर्ने गरी ६ हजार पाउनेछन् ।
यसरी म्यादी प्रहरीमा छनौट भएकाहरूले प्रतिव्यक्ती रु ४३ हजार ४४० पाउने प्रहरी प्रधान कार्यालय मानवश्रोत एवं प्रशासन विभागले जनाएको छ ।
